പ്രഭാതഭക്ഷണം ഒഴിവാക്കിയാൽ എന്തു സംഭവിക്കും?

ദിവസത്തിലെ ഏറ്റവും പ്രധാനപ്പെട്ട ഭക്ഷണമാണ് പ്രഭാതഭക്ഷണമെന്നാണ് വിദഗ്ധര്‍ പറയുന്നത്. വ്യത്യസ്ത ഭക്ഷണശീലങ്ങളും ഡയറ്റുമൊക്കം മൂലം പലരും പ്രഭാതഭക്ഷണത്തിന് വലിയ പ്രധാന്യമൊന്നും കൊടുക്കാറില്ലെങ്കിലും ഒരിക്കലും രാവിലെയുള്ള ഭക്ഷണം ഒഴിവാക്കരുതെന്നാണ് ഡോക്ടര്‍മാര്‍ നിര്‍ദേശിക്കുന്നത്.

''നിങ്ങള്‍ ദീര്‍ഘകാലം പ്രഭാത ഭക്ഷണം ഒഴിവാക്കുമ്പോള്‍ അമിതദേഷ്യം, മലബന്ധം,മുടി കൊഴിച്ചില്‍ എന്നിവയ്ക്ക് കാരണമാകും. പെൺകുട്ടികൾ ഇടവിട്ടുള്ള ഉപവാസം (IF) പോലുള്ള ഭക്ഷണരീതികൾ പരീക്ഷിക്കുമ്പോൾ ക്രമം തെറ്റിയ ആര്‍ത്തവത്തിനും കാരണമാകുന്നു. നിങ്ങളുടെ മാനസികവും ശാരീരികവുമായ ആരോഗ്യത്തിന് ക്രമമായ ആര്‍ത്തവം ആവശ്യമാണ്'' സെലിബ്രിറ്റി ന്യൂട്രീഷ്യനിസ്റ്റായ ഡോ. റുജുത ദിവേകർ പറയുന്നു. പ്രഭാത ഭക്ഷണം ഒഴിവാക്കിയതുകൊണ്ട് ശരീരത്തിന് ഒരു നേട്ടവും ഉണ്ടാകില്ല. ഭക്ഷണത്തിനിടയിൽ നീണ്ട ഇടവേളകൾ ഉണ്ടെങ്കിൽ, അത് തലവേദന, മൈഗ്രെയ്ൻ, ഉത്കണ്ഠ എന്നിവയ്ക്ക് കാരണമാകും. ഭക്ഷണത്തിനിടയിലെ നീണ്ട ഇടവേളകള്‍ കൊണ്ട് അധിക നേട്ടങ്ങളൊന്നും ഉണ്ടാകില്ലെന്ന് പഠനങ്ങളും പറയുന്നു. ഭാരം കുറയ്ക്കല്‍, പ്രമേഹ സാധ്യത കുറയ്ക്കല്‍ തുടങ്ങിയ ഗുണങ്ങളൊന്നും ഇതുകൊണ്ട് ഉണ്ടാകുന്നില്ല.

നിങ്ങൾ പ്രഭാതഭക്ഷണവും ഉച്ചഭക്ഷണവും അത്താഴവും കഴിക്കുകയാണെങ്കിൽ ദീർഘനേരം ഭക്ഷണം കഴിക്കാത്ത ഒരാളുടെ അതേ അളവിൽ ശരീരഭാരം കുറയുമെന്ന് റുജുത പറയുന്നു. " രാത്രി മണിക്കൂറുകളോളം ഭക്ഷണം ഉപേക്ഷിച്ചതിനു ശേഷം നമ്മൾ കഴിക്കുന്ന ഒരു ദിവസത്തെ ആദ്യത്തെ ഭക്ഷണമാണ് പ്രഭാതഭക്ഷണം. ദിവസേനയുള്ള ഊർജ്ജ ഉപഭോഗത്തിന്‍റെ 15-25% പ്രഭാതഭക്ഷണത്തിൽ നിന്നായിരിക്കണമെന്ന് ഗവേഷണങ്ങൾ സൂചിപ്പിക്കുന്നു. പ്രഭാതഭക്ഷണം കഴിക്കുന്നതിലൂടെ വിശപ്പ് കുറയ്ക്കുകയും ദിവസം മുഴുവൻ ഊര്‍ജം പ്രദാനം ചെയ്യുകയും ചെയ്യുന്നു. ഇത് മികച്ച ഉൽപ്പാദനക്ഷമത, മെച്ചപ്പെട്ട ശരീരഘടന, മെച്ചപ്പെട്ട മാനസികാവസ്ഥ എന്നിവയ്ക്കും കാരണമാകുന്നു.'' ഡയറ്റീഷ്യനായ നിധി അഗര്‍വാള്‍ പറഞ്ഞു.

പ്രഭാതഭക്ഷണം ഒഴിവാക്കുന്നത് ശരീരത്തിലെ മൈക്രോ ന്യൂട്രിയന്‍റിനെയും ബാധിക്കുമെന്ന് റുജുത പറയുന്നു. ബോളിവുഡ് നടി കരീന കപൂറടക്കമുള്ള താരങ്ങളുടെ ഡയറ്റീഷ്യനാണ് റുജുത. പ്രഭാതഭക്ഷണം ഒഴിവാക്കുന്നത് വേഗത്തിൽ ശരീരഭാരം കുറയ്ക്കാൻ ഇടയാക്കില്ലെന്നും അവർ കൂട്ടിച്ചേർത്തു.പകരം, ഇത് വിശപ്പ്, അസിഡിറ്റി, വയറിളക്കം, ഉത്കണ്ഠ, തലവേദന, തൃപ്തിയില്ലായ്മ, ക്രമരഹിതമായ ആർത്തവം മുതലായവയ്ക്ക് കാരണമാകുന്നു. ജങ്ക് ഫുഡുകളെക്കാള്‍ വീട്ടില്‍ ഉണ്ടാക്കുന്ന ഭക്ഷണം പ്രഭാതഭക്ഷണത്തില്‍ ഉള്‍പ്പെടുത്തുന്നതായിരിക്കും നല്ലത്.