ഭാരത്‌ജോഡോ ന്യായ് യാത്ര അവസാനഘട്ടത്തിലേക്ക്; മാർച്ച് 17 ന് മുംബൈയിൽ സമാപിക്കും
Update: 2024-03-12 02:20 GMT
ഡല്‍ഹി: കോണ്‍ഗ്രസ് നേതാവ് രാഹുല്‍ നയിക്കുന്ന ഭാരത് ജോഡോ ന്യായ് യാത്ര അവസാന ഘട്ടത്തില്‍ എത്തി നില്‍ക്കുകയാണ്. ന്യായ് യാത്ര ഇന്ന് മഹാരാഷ്ട്രയില്‍ പ്രവേശിക്കും. മഹാരാഷ്ട്രയിലൂടെ ആറ് ദിവസം സഞ്ചരിക്കുന്ന യാത്ര നന്ദുര്‍ബാറിലെ ജില്ലയിലെ ഗോത്ര മേഖലയില്‍ നിന്നാണ് പര്യടനം ആരംഭിക്കുന്നത്.
ഈ മാസം 17നാണ് രാഹുലിന്റെ ഭാരത് ജോഡോ ന്യായ് യാത്ര സമാപിക്കുക. ലോക്‌സഭാതെരഞ്ഞെടുപ്പ് പ്രചാരണത്തിന്റെ തുടക്കമായി യാത്രയുടെ സമാപനം മാറ്റാനാണ് കോണ്‍ഗ്രസ് തീരുമാനം. 17ന് മുംബൈയിലെ ശിവാജി പാര്‍ക്കിലാണ് സമ്മേളനം സംഘടിപ്പിച്ചിരിക്കുന്നത്. ഇന്‍ഡ്യ മുന്നണിയിലെ എല്ലാ പാര്‍ട്ടികളുടെയും പ്രധാന നേതാക്കളെ പങ്കെടുപ്പിക്കാനാണ് നീക്കം.
ജനുവരി 14 ന് മണിപ്പൂരിലെ തൗബാലിൽ വെച്ചാണ് ഭാരത് ജോഡോ ന്യായ് യാത്ര ആരംഭിച്ചത്. കോൺഗ്രസ് ദേശീയ അധ്യക്ഷൻ മല്ലികാർജുൻ ഗാർഖെയായിരുന്നു ന്യായ് യാത്ര ഫ്ലാഗ് ഓഫ് ചെയ്തിരുന്നത്. ഭാരത് ജോഡോ യാത്രയിൽ നിന്ന് വ്യത്യസ്തമായി കാൽനട യാത്രയും ഒപ്പം വാഹന യാത്രയും ഉൾക്കൊള്ളിച്ചതായിരുന്നു ന്യായ് യാത്ര.