ലോക്‌സഭാ തെരഞ്ഞെടുപ്പിന് ശേഷം മൂന്ന് മാസത്തിനുള്ളിൽ കോൺഗ്രസ് പിളരും: ബസവരാജ് ബൊമ്മെ

ബെംഗളൂരു: വരുന്ന ലോക്‌സഭാ തെരഞ്ഞെടുപ്പിന് ശേഷം മൂന്ന് മാസത്തിനുള്ളിൽ അഖിലേന്ത്യാ തലത്തില്‍ കോൺഗ്രസ് പിളരുമെന്നും സിദ്ധരാമയ്യയുടെ നേതൃത്വത്തിലുള്ള സംസ്ഥാന സർക്കാരിൽ അതിൻ്റെ ആഘാതം ദൃശ്യമാകുമെന്നും കർണാടക മുൻ മുഖ്യമന്ത്രിയും ബി.ജെ.പി നേതാവുമായ ബസവരാജ് ബൊമ്മെ. ആഭ്യന്തര കലഹങ്ങൾ കാരണം കര്‍ണാടക സർക്കാർ അധികകാലം നിലനിൽക്കില്ലെന്നും അദ്ദേഹം കൂട്ടിച്ചേര്‍ത്തു.

"ദേശീയ തലത്തിൽ കോൺഗ്രസിൻ്റെ ശിഥിലീകരണം കർണാടകയിൽ അനുഭവപ്പെടും, അവിടെ പാർട്ടി രണ്ട് വിഭാഗങ്ങളായി പിളരും. കര്‍ണാടകയിലെ കോണ്‍ഗ്രസ് സര്‍ക്കാര്‍ കാലാവധി പൂര്‍ത്തിയാക്കില്ല''. തിങ്കളാഴ്ച ജില്ലയിലെ ഗജേന്ദ്രഗഡിൽ മാധ്യമപ്രവർത്തകരോട് സംസാരിക്കുകയായിരുന്നു ബൊമ്മെ. കോൺഗ്രസ് പാർട്ടി അന്തർലീനമായിരിക്കുകയാണെന്നും സർക്കാർ എപ്പോൾ വേണമെങ്കിലും വീഴാം. ഗദഗ്-ഹാവേരി നിയോജക മണ്ഡലത്തിൽ നിന്നുള്ള സിറ്റിംഗ് എംപി ശിവകുമാർ ഉദസി നിരവധി വികസന പ്രവർത്തനങ്ങൾ നടത്തിയിട്ടുണ്ടെന്നും കേന്ദ്ര സർക്കാരിൻ്റെ പദ്ധതികൾ ഫലപ്രദമായി നടപ്പാക്കിയിട്ടുണ്ടെന്നും അദ്ദേഹം മാധ്യമപ്രവർത്തകരോട് പറഞ്ഞു.

''നരേന്ദ്ര മോദി മൂന്നാം തവണയും പ്രധാനമന്ത്രിയാകും.ഗദഗ്-ഹവേരി ലോക്സഭാ മണ്ഡലത്തിൽ മൊത്തത്തിൽ മികച്ച പ്രതികരണമാണ് ലഭിക്കുന്നത്'' അദ്ദേഹം അവകാശപ്പെട്ടു. ഗദഗ്-ഹവേരി സീറ്റിൽ പാതി മനസോടെയാണോ തെരഞ്ഞെടുപ്പിൽ മത്സരിക്കുന്നതെന്ന ചോദ്യത്തിന് പാർട്ടിയുടെ ഹൈക്കമാൻഡ് നിർദേശം നൽകുമ്പോൾ അങ്ങനെയൊരു ചോദ്യം ഉയരുന്നില്ലെന്നും ബൊമ്മൈ പറഞ്ഞു.എതിരാളിയെ ബഹുമാനിക്കുമെന്നും ആരെയും നിസ്സാരമായി കാണില്ലെന്നും അദ്ദേഹം കൂട്ടിച്ചേര്‍ത്തു.

''കര്‍ണാടകയില്‍ ബി.ജെ.പി കെട്ടിപ്പടുക്കുന്നതിൽ ഈശ്വരപ്പ ഒരു പ്രധാന പങ്ക് വഹിച്ചു. ഹവേരി ലോക്‌സഭാ സീറ്റിൽ നിന്ന് മകൻ കെ ഇ കാന്തേഷിന് പാർട്ടി ടിക്കറ്റ് നിഷേധിച്ചതിൽ അദ്ദേഹം നിരാശനാണ്. ഷിമോഗയിൽ സ്വതന്ത്രനായി മത്സരിക്കരുതെന്ന് പാർട്ടി നേതൃത്വം അദ്ദേഹത്തെ ബോധ്യപ്പെടുത്തും''പാര്‍ട്ടിയിലെ മുതിര്‍ന്ന നേതാവ് കെ.എസ് ഈശ്വരപ്പയുടെ വിമര്‍ശനങ്ങളെ പരാമര്‍ശിച്ച് ബൊമ്മെ പറഞ്ഞു. ''ആഭ്യന്തര സർവേ നടത്തിയാണ് പാർട്ടി ഹൈക്കമാൻഡ് എന്നെ ഹവേരി സ്ഥാനാർഥിയായി തെരഞ്ഞെടുത്തത്. ഞാൻ മത്സരിക്കണമെന്ന് നേതൃത്വത്തിന് താൽപര്യമുണ്ട്. ഹൈക്കമാൻഡിൻ്റെ നിർദ്ദേശങ്ങൾ പാലിക്കുക മാത്രമാണ് താൻ ചെയ്യുന്നതെന്നും'' അദ്ദേഹം പറഞ്ഞു.