പശുവിനെ ആക്രമിച്ച സിംഹത്തെ പറപറത്തി കര്‍ഷകന്‍; വൈറല്‍ വീഡിയോ

ജുനാഗഡ്: സിംഹത്തിന്റെ ആക്രമണത്തിൽ നിന്ന് പശുവിനെ രക്ഷിച്ച കർഷകന്‍റെ വീഡിയോയാണ് സമൂഹമാധ്യമങ്ങളില്‍ വൈറലായിക്കൊണ്ടിരിക്കുന്നത്. ഗുജറാത്തിലെ ജുനഗഡിലെ കേശോദ് സ്വദേശി വിവേക് ​​കൊട്ടാഡിയയാണ് വീഡിയോ ട്വിറ്ററിൽ പങ്കുവെച്ചത്. ഗിർ സോമനാഥ് ജില്ലയിലാണ് സംഭവം. കർഷകൻ പശുവിന്റെ അടുത്തേക്ക് വരുന്നതും സിംഹത്തെ വിരട്ടി ഓടിക്കാൻ ശ്രമിക്കുന്നതും ദൃശ്യങ്ങളിൽ കാണാം. കർഷകൻ വിജയകരമായി തന്നെ ത​ന്റെ പശുവിനെ രക്ഷിക്കുകയും സിംഹത്തെ ഓടിക്കുകയും ചെയ്തു.

സിംഹത്തി​ന്റെ പിടിയിൽ കു‌‌ടുങ്ങിയ പശുവിനെ ആണ് വീഡിയോയിൽ ആ​ദ്യം കാണിക്കുന്നത്. സിംഹത്തിന്റെ പിടിയിൽ നിന്ന് രക്ഷപ്പെടാൻ പശു ശ്രമിക്കുണ്ടെങ്കിലും ശ്രമങ്ങൾ വിഫലമാകുകയാണ്. ഇതു കണ്ട കര്‍ഷകന്‍ റോഡരികിൽ നിന്ന് ഒരു ഇഷ്ടിക എടുത്ത് സിംഹത്തി​ന്റെ നേരെ എറിയുന്നത് കാണാം. കർഷകൻ അടുത്തെത്തുമ്പോൾ, സിംഹം സംഭവസ്ഥലത്ത് നിന്ന് ഓടിപ്പോകുന്നതും വീഡിയോയില്‍ കാണാം.