വഖഫ്​ ഭേദഗതി ബില്ലിനെതിരായ പ്രതിഷേധത്തിൽ അണിനിരന്ന്​ ലാലുവും തേജസ്വിയും

പട്​ന: കേന്ദ്ര സർക്കാർ അവതരിപ്പിച്ച വഖഫ്​ ഭേദഗതി ബി​ല്ലിനെതിരെ ബിഹാറിൽ നടന്ന പ്രതിഷേധത്തിൽ അണിനിരന്ന്​ മുൻ മുഖ്യമന്ത്രിയും ആർജെഡി നേതാവുമായ ലാലു പ്രസാദ്​ യാദവും മകനും എംപിയുമായ തേജസ്വി യാദവും. ഭേദഗതി പിൻവലിക്കുന്നത്​ വരെ ബില്ലിനെ ചെറുക്കുമെന്ന് തേജസ്വി​ യാദവ്​ വ്യക്​തമാക്കി. ആൾ ഇന്ത്യാ മുസ്​ലിം പേഴ്​സനൽ ലോ ബോർഡി​​െൻറ നേതൃത്വത്തിലായിരുന്നു പ്രതിഷേധ പരിപാടി.

ബുധനാഴ്ച ആർജെഡി എംഎൽഎമാരും ഇടതു സഖ്യകക്ഷികളും ത്രിവർണ്ണ പതാകയും വിവാദ ബില്ലിനെ എതിർത്തുകൊണ്ടുള്ള മുദ്രാവാക്യങ്ങളടങ്ങിയ പ്ലക്കാർഡുകളുമേന്തിയാണ്​ നിയമസഭയിലെത്തിയത്​. പ്രതിഷേധത്തെ തുടർന്ന്​ ഉച്ചയ്ക്ക് രണ്ട്​ വരെ സഭ നിർത്തിവച്ചു.

ജനാധിപത്യ-ഭരണഘടനാ വിരുദ്ധ ബിൽ പിൻവലിക്കുന്നതുവരെ പോരാടുമെന്ന്​ തേജസ്വി യാദവ്​ പ്രതിഷേധ യോഗത്തിൽ വ്യക്​തമാക്കി. വൃക്ക മാറ്റിവയ്ക്കലും ഹൃദയ ശസ്ത്രക്രിയയും മൂലം ശരീരം തളർന്നുപോയിട്ടും ഇവിടെയെത്തിയ ലാലു പ്രസാദ്​ യാദവി​െൻറ രക്തം എന്റെ സിരകളിലുണ്ടെന്നതിൽ ഞാൻ അഭിമാനിക്കുന്നു. വഖഫ് വിഷയത്തിൽ ഞങ്ങൾ നിയമസഭയിൽ അടിയന്തര പ്രമേയം അവതരിപ്പിച്ചിരുന്നു.

സ്വേച്ഛാധിപത്യപരവും ഭരണഘടനയെ ജനാലയിലൂടെ പുറത്തേക്ക് വലിച്ചെറിയാൻ ആഗ്രഹിക്കുന്നതുമായ ഈ സർക്കാരിന്റെ അജണ്ട ഞങ്ങൾ കാറ്റിൽ പറത്തും. ഇന്ന് വഖഫ് നിയന്ത്രിക്കുന്നതിന്റെ പേരിൽ അവർ മുസ്​ലിംകളെ ലക്ഷ്യം വയ്ക്കുകയാണ്. നാളെ ക്രിസ്ത്യാനികളുടെയും സിഖുകാരുടെയും ഊഴമായിരിക്കാമെന്നും തേജസ്വി യാദവ്​ കൂട്ടിച്ചേർത്തു. അധികാരത്തോടുള്ള അത്യാഗ്രഹം കാരണം ബില്ലിനെ പിന്തുണയ്ക്കുന്ന ചിലരുണ്ടെന്നും നിതീഷ്​ കുമാറിനെ ഉന്നമിട്ടുകൊണ്ട് തേജസ്വി​ പറഞ്ഞു. പ്രതിഷേധ പരിപാടിയിൽ ജൻ സുരാജ് പാർട്ടി നേതാവ്​ പ്രശാന്ത് കിഷോറും പ​ങ്കെടുത്തു.