മലമുകളിൽ നിന്ന് സൈനികവാഹനത്തിന് നേരെ ഭീകരരുടെ വെടിവെപ്പ്; ജമ്മു കശ്‌മീരിൽ ഏറ്റുമുട്ടൽ

ജമ്മു കശ്മീരിൽ സൈനിക വാഹനത്തിന് നേരെ ഭീകരാക്രമണം. രണ്ട് സൈനികർക്ക് പരിക്കേറ്റു. കത്വ ജില്ലയിലെ ബർനോട്ട മേഖലയിയാണ് ആക്രമണമുണ്ടായത്. മലമുകളിൽ നിന്ന് വാഹനത്തിന് നേരെ വെടിയുതിർക്കുകയായിരുന്നു. മേഖലയിൽ സൈന്യവും ഭീകരരും തമ്മിൽ ഏറ്റുമുട്ടൽ തുടരുകയാണ്. 

ആക്രമണത്തിൽ പരിക്കേറ്റ രണ്ട് ജവാൻമാരെ ആശുപത്രിയിൽ പ്രവേശിപ്പിച്ചിരിക്കുകയാണ്. സൈനിക വാഹനത്തിന് നേരെ ഭീകരർ ഗ്രനേഡ് എറിഞ്ഞതായും റിപ്പോർട്ടുകളുണ്ട്. കഴിഞ്ഞ ഏതാനും ആഴ്ചകളായി ജമ്മു കശ്മീരിൽ ഭീകരാക്രമണങ്ങൾ വർധിച്ചുവരികയാണ്. 

ജൂൺ 11, 12 തീയതികളിലായി ജമ്മു കശ്മീരിലെ ദോഡ ജില്ലയിൽ ഇരട്ട ഭീകരാക്രമണം ഉണ്ടായി. ജൂൺ 11 ന്, ഛത്തർഗല്ലയിലെ സംയുക്ത ചെക്ക് പോസ്റ്റിൽ തീവ്രവാദികൾ നടത്തിയ ആക്രമണത്തിൽ ആറ് സുരക്ഷാ ഉദ്യോഗസ്ഥർക്ക് പരിക്കേറ്റിരുന്നു. ജൂൺ 12 ന് ഗണ്ഡോ മേഖലയിലെ കോട്ട മുകളിൽ തീവ്രവാദികളുമായുള്ള ഏറ്റുമുട്ടലിൽ ഒരു പോലീസ് ഉദ്യോഗസ്ഥനും  പരിക്കേറ്റു.

ജൂൺ 26ന് ജമ്മു കശ്മീരിലെ ദോഡ ജില്ലയിലെ വനമേഖലയിൽ സുരക്ഷാസേനയുമായുള്ള ഏറ്റുമുട്ടലിൽ മൂന്ന് ഭീകരർ കൊല്ലപ്പെട്ടിരുന്നു. ജൂൺ 11, 12 തീയതികളിൽ മലയോര ജില്ലയിൽ നടന്ന ഇരട്ട ഭീകരാക്രമണത്തെത്തുടർന്ന് സൈന്യവും സെൻട്രൽ റിസർവ് പോലീസ് ഫോഴ്‌സും (സിആർപിഎഫ്) നടത്തിയ സംയുക്ത ഓപ്പറേഷനൊടുവിലാണ് ഭീകരരെ വധിച്ചത്.