ഇടുക്കിയില്‍ ത്രികോണ മത്സരം
Update: 2017-06-24 15:39 GMT
നാലാമതൊരു വിജയത്തിനായി റോഷിയെ തന്നെ യു.ഡി.എഫ്. കളത്തിലിറക്കുമ്പോള്‍ മത്സരം പഴതുപോലെ ആകില്ലായെന്ന് അവരും കരുതുന്നു.
പ്രചരണം മൂന്നാംഘട്ടത്തില്‍ എത്തിനില്‍ക്കുമ്പോള്‍ ശക്തമായ ത്രികോണമത്സരത്തിന് വേദിയാകുകയാണ് ഇടുക്കി നിയോജകമണ്ഡലം.ഇവിടെ കേരളാ കോണ്‍ഗ്രസ്സിലെ രണ്ട് പ്രമുഖ സ്ഥാനാര്‍ഥികള്‍ മത്സരിക്കുന്നു എന്ന പ്രത്യേകത കൂടിയുണ്ട്.
ഇടുക്കി നിയോജകമണ്ഡലം യു.ഡി.എഫിന്‍റെ ഉറച്ചകോട്ടകളില്‍ ഒന്നാണ്. ഇതുകൊണ്ടുതന്നെ കഴിഞ്ഞ മൂന്നു നിയമസഭാ തിരഞ്ഞെടുപ്പുകളിലും നല്ല ഭൂരിപക്ഷത്തില്‍ തന്നെയാണ് കേരളാകോണ്‍ഗ്രസ്സ് മാണി വിഭാഗം നേതാവ് റോഷി അഗസ്റ്റിന്‍ ഇവിടെ വിജയിച്ചിരുന്നത്. നാലാമതൊരു വിജയത്തിനായി റോഷിയെ തന്നെ യു.ഡി.എഫ്. കളത്തിലിറക്കുമ്പോള്‍ മത്സരം പഴതുപോലെ ആകില്ലായെന്ന് അവരും കരുതുന്നു.
എല്‍.ഡി.എഫ് സ്ഥാനാര്‍ഥി ജനാധിപത്യ കേരളാകോണ്‍ഗ്രസ്സിന്‍റെ ഫ്രാന്‍സിസ് ജോര്‍ജ്ജാണ്. മുന്‍പ് ലോകസഭയിലേക്ക് 2 തവണ ഇടുക്കിയെ പ്രതിനിധീകരിച്ചിട്ടുള്ള ഫ്രാന്‍സിസ് ജോര്‍ജ്ജിനും അദ്ദേഹം ചെയര്‍മാനായ ജനാധിപത്യ കേരളാകോണ്‍ഗ്രസ്സിനും വിജയം അനിവാര്യമാണ്. അതുകൊണ്ടു തന്നെ ശക്തമായ പ്രചാരണത്തിലാണ് അദ്ദേഹം.
എന്‍.ഡി.എ ഘടകകഷിയായ ബി.ഡി.ജെ.എസ്. ശക്തമായ സാന്നിധ്യമാണ് മണ്ഡലത്തില്‍ ഉടനീളം കാഴ്ച്ചവെക്കുന്നത്. 44500 ഈഴവ വോട്ടുകള്‍ ഉള്ളമണ്ഡലത്തില്‍ ഹൈന്ദവവോട്ടുകളുടെ ഏകീകരണം ഉണ്ടായാല്‍ അത്ഭുതം സംഭവിക്കുമെന്ന് അവര്‍ കരുതുന്നു. മൂന്നു മുന്നണികളും പ്രചാരണത്തില്‍ ഒപ്പത്തിനൊപ്പം മുന്നേറുമ്പോള്‍ പ്രവചനം അസാദ്ധ്യമാക്കുന്നു. ഈ പശ്ചിമഘട്ട താഴ്വര.