കെപിസിസി പ്രസിഡന്‍റ് ചുമതല എം എം ഹസന് നല്‍കണമെന്ന് എ ഗ്രൂപ്പ്
Update: 2017-12-23 20:39 GMT
പുതിയ പ്രസിഡന്‍റിനെ വിശദമായ ചര്‍ച്ചകള്‍ക്ക് ശേഷം നിയമിച്ചാല്‍ മതിയെന്നും എ ഗ്രൂപ്പ്
കെപിസിസി പ്രസിഡന്‍റിന്‍റെ ചുമതല എം എം ഹസന് നല്‍കാന്‍ എ ഗ്രൂപ്പ് നിര്‍ദേശം. പുതിയ പ്രസിഡന്‍റിനെ വിശദമായ ചര്‍ച്ചകള്‍ക്ക് ശേഷം നിയമിച്ചാല്‍ മതിയെന്നും എ ഗ്രൂപ്പ്. അതേസമയം പ്രസിഡന്‍റ് കാര്യത്തില്‍ ഐ ഗ്രൂപ്പ് വ്യക്തമായി നിലപാടിലേക്കെത്തിയില്ല. അതിനിടെ ഉമ്മന്‍ചാണ്ടി കെപിസിസി അധ്യക്ഷനാകണമെന്ന അഭിപ്രായത്തിന് എ ഗ്രൂപ്പില്‍ ശക്തിയേറി.
വി എം സുധീരന്‍ രാജിവെച്ച ഒഴിവില്‍ താല്ക്കാലിക ചുമതല നല്‍കുകയാണോ പുതിയ പ്രസിഡന്‍റിനെ നിയമിക്കുകയാണോ എന്നതില്‍ ഹൈകമാന്‍ഡ് ഇതുവരെ നിലപാട് എടുത്തിട്ടില്ല. ഇതിനിടെയാണ് ഇപ്പോള്‍ ചുമതല നല്‍കിയാല്‍ മതിയെന്നും പുതിയ പ്രസിഡന്‍റ് വിശദമായ ചര്‍ച്ചകള്‍ക്ക് ശേഷം മതിയെന്ന നിര്‍ദേശം എ ഗ്രൂപ്പ് മുന്നോട്ട് വെച്ചത്. കെ സി ജോസഫ്, എം എം ഹസന്, തിരുവ‍ഞ്ചൂര്‍, പി ടി തോമസ് എന്നീ പേരുകള്‍ ഉയരുന്നുണ്ടെങ്കിലും കെപിസിസി സ്ഥാനത്തേക്ക് ഉമ്മന്‍ചാണ്ടിയെക്കാള്‍ നല്ലൊരു നിര്‍ദേശമില്ലെന്ന അഭിപ്രായത്തിന് എ ഗ്രൂപ്പില്‍ പിന്തുണ വര്‍ധിച്ചിട്ടുണ്ട്. സ്ഥാനങ്ങളേല്‍ക്കാനില്ലെന്ന നിലപാടില്‍ നിന്ന് ഉമ്മന്‍ചാണ്ടി മാറിയിട്ടുമില്ല. ഈ സാഹചര്യത്തിലാണ് താല്ക്കാലിക ചുമതലയെന്ന നിലപാടില്‍ എ ഗ്രൂപ്പ് എത്തിയത്. എം എം ഹസനാണ് എ ഗ്രൂപ്പിന്‍റെ നിര്‍ദേശം.
എ ഗ്രൂപ്പ് നിലപാട് ഉമ്മന്‍ചാണ്ടി ഹൈകമാന്‍ഡ് വൃത്തങ്ങളെയും രമേശ് ചെന്നിത്തലയെയും അറിയിച്ചു. ഇതില്‍ എതിര്‍പ്പ് പ്രകടിപ്പിച്ചില്ലെങ്കിലും നിലപാട് ഐ ഗ്രൂപ്പ് വ്യക്തമാക്കിയിട്ടില്ല. വി ഡി സതീശന്‍, കെ മുരളീധരന്‍, കെ സുധാകരന്‍ എന്നിങ്ങനെ തങ്ങളുടെ നോമിനികള്‍ ഉള്ളതിനാല്‍ ഹൈകമാന്‍ഡ് നിലപാട് അറിഞ്ഞ ശേഷം ചര്‍ച്ച തുടങ്ങാമെന്ന നിലപാടിലാണ് ഐ ഗ്രൂപ്പ്. എ കെ ആന്‍റണി ഉള്‍പ്പെടെ മറ്റു മുതിര്‍ന്ന നേതാക്കളുമായി ചര്‍ച്ച ചെയ്ത ശേഷമായിരിക്കും ഹൈകമാന്‍ഡ് തീരുമാനത്തിലെത്തുക. മലപ്പുറം തെരഞ്ഞെടുപ്പ് അടുത്ത സാഹചര്യത്തില്‍ തീരുമാനം വൈകരുതെന്നാണ് പാര്‍ട്ടിയിലെ പൊതുഅഭിപ്രായം.