10 കിലോ ക‍ഞ്ചാവുമായി യുവാവ് പിടിയില്‍
Update: 2018-03-05 07:22 GMT
ഉത്തരേന്ത്യന്‍ നിന്നും കേരളത്തിലേക്ക് സ്ഥിരമായി കഞ്ചാവ് എത്തിക്കുന്ന ഇടനിലക്കാരന്‍ പിടിയില്‍.
ഉത്തരേന്ത്യന്‍ നിന്നും കേരളത്തിലേക്ക് സ്ഥിരമായി കഞ്ചാവ് എത്തിക്കുന്ന ഇടനിലക്കാരന്‍ പിടിയില്‍. ഫോര്‍ട്ട് കൊച്ചി സ്വദേശി രതീഷ് ദാസിനെയാണ് എറണാകുളം റെയില്‍വേ പോലീസ് പിടികൂടിയത്. ഇയാളുടെ പക്കല്‍ നിന്നും 10 കിലോ കഞ്ചാവ് റെയില്‍വേ പൊലീസ് പിടിച്ചെടുത്തു.
സ്വാതന്ത്ര്യ ദിനാഘോഷങ്ങളുടെ ഭാഗമായി റെയില്‍വേ പോലീസ് നടത്തിയ പരിശോധനയിലാണ് കഞ്ചാവ് പിടികൂടിയത്. പാട്ന - എറണാകുളം ട്രെയിനില്‍ ഇന്നലെ നോര്‍ത്ത് റെയില്‍വേ സ്റ്റേഷനില്‍ എത്തിയ ഫോര്‍ട്ട് കൊച്ചി സ്വദേശി രതീഷ് ദാസിന്‍റെ പക്കല്‍ നിന്നുമാണ് കഞ്ചാവ് കണ്ടെത്തിയത്. രണ്ട് ബാഗുകളിലായി 10 കിലോ കഞ്ചാവാണ് ഇയാള്‍ കൊണ്ടുവന്നത്. ഉത്തരേന്ത്യയില്‍ നിന്നും കേരളത്തിലേക്ക് കഞ്ചാവ് എത്തിക്കുന്ന സംഘത്തിലെ പ്രധാനിയാണ് ഇയാളെന്ന് റെയില്‍വേ പൊലീസ് പറഞ്ഞു. ഇയാള്‍ക്ക് പിന്നില്‍ ആരെങ്കിലും ഉണ്ടോ എന്നതിനെ കുറിച്ചും അന്വേഷിക്കുന്നുണ്ട്.
കൊച്ചി, ആലുവ പെരുമ്പാവൂര്‍ എന്നിങ്ങനെ ഇതര സംസ്ഥാനക്കാര്‍ ഏറെയുള്ള പ്രദേശങ്ങളിലെ വിപണി ലക്ഷ്യമിട്ടാണ് കഞ്ചാവ് കൊണ്ടുവന്നിരുന്നത്. റെയില്‍വേ പോലീസ് സൂപ്രണ്ടിന്‍റെ നിര്‍ദ്ദേശ പ്രകാരം സിഐ വി എസ് ഷാജുവും സംഘവും നടത്തിയ പരിശോധനയിലാണ് ഇയാള്‍ പിടിയിലായത്. അറസ്റ്റ് രേഖപ്പെടുത്തിയ പ്രതിയെ ഉടന്‍ കോടതിയില്‍ ഹാജരാക്കും.