സ്വരാജിനായി തൃപ്പൂണിത്തുറ ബസ് സ്റ്റാന്റില് ഫ്ലാഷ് മോബ്
Update: 2018-03-25 14:16 GMT
സെല്‍ഫി ഫോര്‍ സ്വരാജ്, വോട്ട് ഫോര്‍ സ്വരാജ്, ഹ്രസ്വചിത്രം നേരിനൊപ്പം സ്വരാജിനൊപ്പം -
തൃപ്പൂണിത്തുറ മണ്ഡലത്തിലെ എല്‍ഡിഎഫ് സ്ഥാനാര്‍ഥി എം സ്വരാജിനായി വ്യത്യസ്ത പ്രചാരണരീതികളാണ് പ്രവര്‍ത്തകര്‍ പയറ്റുന്നത്. തങ്ങളുടെ യുവ നേതാവിനെ സഭയിലെത്തിക്കുന്നതായി ഡിവൈഎഫ്ഐ പ്രവര്‍ത്തകര്‍ തന്നെയാണ് പ്രചാരണ പരിപാടികളില്‍ മുന്നിലുള്ളത്. ഫ്ലാഷ് മോബ്, ഹ്രസ്വ ചിത്രം, സെല്‍ഫി ഫോര്‍ സ്വരാജ് എന്നിങ്ങനെ നിരവധി പരിപാടികളാണ് പ്രവര്‍ത്തകര്‍ ഇതിനകം സംഘടിപ്പിച്ചത്.
വോട്ടെടുപ്പിന് ദിവസങ്ങള് മാത്രം ശേഷിക്കെ തൃപ്പൂണിത്തുറ മണ്ഡലത്തിലെ എല്‍ഡിഎഫ് സ്ഥാനാര്‍ഥി എം സ്വരാജിന്റെ വിജയത്തിനായി അക്ഷീണ പ്രയത്നത്തിലാണ് പ്രവര്‍ത്തകര്‍. യുവാക്കളുടെ വോട്ടുകള്‍ ലക്ഷ്യം വെച്ചുള്ള പ്രചാരണത്തിലാണ് ഡിവൈഎഫ്ഐ പ്രവര്‍ത്തകര്‍ ശ്രദ്ധ ചെലുത്തുന്നത്. സെല്‍ഫി ഫോര്‍ സ്വരാജും വോട്ട് ഫോര്‍ സ്വരാജും നേരത്തെ തന്നെ സാമൂഹ്യമാധ്യമങ്ങളില്‍ ശ്രദ്ധിക്കപ്പെട്ടിരുന്നു. തൃപ്പൂണിത്തുറ ഗവണ്‍മെന്‍റ് കോളജിലെ വിദ്യാര്‍ഥികളുടെ സ്വരാജിന് വോട്ട് ചെയ്യണമെന്നഭ്യര്‍ഥിച്ച് കൊണ്ടുള്ള ഫ്ലാഷ് മോബും കഴിഞ്ഞ ദിവസം തൃപ്പൂണിത്തുറ ബസ് സ്റ്റാന്റില് വെച്ച് അരങ്ങേറി.
നേരിനൊപ്പം സ്വരാജിനൊപ്പം എന്ന പേരില്‍ സിപിഎം എറണാകുളം ജില്ലാ കമ്മിറ്റി തയ്യാറാക്കിയ ഹ്രസ്വചിത്രം സംവിധായകന്‍ പ്രിയനന്ദനന്‍ സംഗീത സംവിധായകന്‍ ബിജിബാലിന് നല്‍കി പ്രകാശനം ചെയ്തു.
കേരളത്തിലെ സാംസ്‌കാരിക ചലച്ചിത്ര രംഗത്തെ പ്രമുഖരും സുഹൃത്തുക്കളും സ്വരാജിനെ കുറിച്ചുള്ള ഓര്‍മകളും അഭിപ്രായങ്ങളും പങ്കുവെയ്ക്കുകയാണ് ഹ്രസ്വചിത്രത്തില്‍.