തകര്‍ക്കണം,തകര്‍ക്കണം നമ്മളീ കൊറോണയെ; വൈറലായി പൊലീസുകാരിയുടെ പാട്ട്

കോവിഡ് 19 എന്ന മഹാമാരിയെ തൂത്തെറിയാനുള്ള ശ്രമത്തിലാണ് നമ്മള്‍. വൈറസിന്റെ വ്യാപനം തടയുന്നതിന്റെ ഭാഗമായി പ്രഖ്യാപിച്ച ലോക് ഡൌണ്‍ തുടരുകയാണ്. സര്‍ക്കാരും ആരോഗ്യപ്രവര്‍ത്തകരും പൊതുജനങ്ങളുമെല്ലാം ഒത്തുപിടിക്കുകയാണ് കൊറോണയെ പിടിച്ചുകെട്ടാന്‍. ഈ കൊറോണക്കാലത്ത് പൊലീസുകാരുടെ പ്രവര്‍ത്തനവും ശ്ലാഘനീയമാണ്.

ഇപ്പോഴിതാ കൊവിഡിനെതിരെ പാട്ടുപാടി പോരാടുകയാണ് ഒരു കൂട്ടം പൊലീസുകാർ. തകർക്കണം തകർക്കണം നമ്മളീ കൊറോണയെ എന്ന് തുടങ്ങുന്ന ഗാനമാണ് ദീപ എന്ന പൊലീസുകാരി ആലപിച്ചിരിക്കുന്നത്. തൊട്ടിൽപ്പാലം ജനമൈത്രി പൊലീസാണ് ഈ പാട്ട് വീഡിയോ ഇറക്കിയിരിക്കുന്നത്.

കോവിഡ് കാലത്ത് സ്വീകരിക്കേണ്ട പ്രതിരോധ മാര്‍ഗങ്ങളെക്കുറിച്ചും വീഡിയോയില്‍ പറയുന്നുണ്ട്. അബ്ദുല്ലക്കുട്ടിയാണ് പാട്ടിന്റെ വരികളെഴുതിയിരിക്കുന്നത്. നിറഞ്ഞ കയ്യടിയാണ് പൊലീസുകാരുടെ പാട്ടിന് ലഭിക്കുന്നത്.