കശ്മീരില്‍ മലയാളി വിനോദസഞ്ചാരികളുടെ വാനില്‍ ട്രക്കിടിച്ച് അപകടം; നാദാപുരം സ്വദേശി മരിച്ചു
കോഴിക്കോട്, മലപ്പുറം, തിരുവനന്തപുരം സ്വദേശികളാണ് അപകടത്തിൽപ്പെട്ടത്
Update: 2024-05-02 08:25 GMT
ശ്രീനഗര്‍: ജമ്മുകശ്മീരിലെ ബാനിഹാളിൽ മലയാളികൾ സഞ്ചരിച്ച വാനിൽ ട്രക്കിലിടിച്ച് ഒരാള്‍ മരിച്ചു. നാദാപുരം സ്വദേശി പി.പി സഫ്‌വാനാണ് മരിച്ചത്. അമിതവേഗത്തിൽ എത്തിയ ട്രക്ക് വാനിൽ ഇടിക്കുകയായിരുന്നു. ഇന്നലെ രാത്രി നടന്ന അപകടത്തിൽ കശ്മീർ സ്വദേശി ഉൾപ്പെടെ 14 പേർക്ക് പരിക്കേറ്റു. ആറുപേരുടെ നില ഗുരുതരമാണ്. വാനിലുണ്ടായിരുന്ന 16 യാത്രക്കാരില്‍ 12 പേരും മലയാളികള്‍ ആണ്.
കോഴിക്കോട്, മലപ്പുറം, തിരുവനന്തപുരം സ്വദേശികളാണ് അപകടത്തിൽപ്പെട്ടത്. മലപ്പുറം ജാമിയ സലഫിയ ഫാര്‍മസി കോളജിലെ മുന്‍ ബിഫാം വിദ്യാര്‍ഥികളാണ് അപകടത്തില്‍പെട്ടവരിൽ ആറുപേര്‍. മരിച്ച സഫ്‌വാന്റെ മൃതദേഹം ബെനി ഹാളിലെ ആശുപത്രിയിൽ സൂക്ഷിച്ചിരിക്കുകയാണ്. പരിക്കേറ്റവർ അനന്ത് നാഗ് മെഡിക്കൽ കോളേജിൽ ചികിത്സയിലാണ്.