ആലപ്പുഴയിൽ കോൺഗ്രസ് മണ്ഡലം കമ്മിറ്റി ഓഫീസിനു നേരെ ആക്രമണം

ആലപ്പുഴയിലെ പാണാവള്ളിയിൽ കോൺഗ്രസ് മണ്ഡലം കമ്മിറ്റി ഓഫീസിനു നേരെ ആക്രമണം. കൊടിമരം, ജനാല, വാതിൽ എന്നിവയാണ് അക്രമകാരികൾ നശിപ്പിച്ചത്. ഇടുക്കി ഗവൺമെന്റ് എഞ്ചിനീയറിംഗ് കോളേജിൽ എസ്എഫ്‌ഐ പ്രവർത്തകൻ ധീരജ് കൊല്ലപ്പെട്ടതിനെ തുടർന്ന് സംസ്ഥാനത്തിന്റെ വിവിധ ഭാഗങ്ങളിലായി കോൺഗ്രസ് ഓഫീസുകൾക്ക് നേരെ ആക്രമണമുണ്ടായിട്ടുണ്ട്.

ഇന്ന് രാവിലെയാണ് അക്രമകാരികൾ ഓഫീസ് അടിച്ചു തകർത്ത വിവരം അറിയുന്നത്. എന്നാൽ ഇന്നലെ രാത്രിയാണ് അക്രമമുണ്ടായതെന്ന് കോൺഗ്രസ് പ്രവർത്തകർ പറഞ്ഞു. കഴിഞ്ഞ ദിവസങ്ങളിൽ ആലപ്പുഴയിലെ വിവിധ പ്രദേശങ്ങളിലായി നിരവധി അക്രമ പരമ്പരകൾ അരങ്ങേറിയിട്ടുണ്ട്. സംഭവത്തിൽ പാണാവള്ളി പൊലീസ് കേസെടുത്തു. സിസിടിവി ദൃശ്യങ്ങളും പൊലീസ് പരിശോധനയ്ക്ക് വിധേയമാക്കുന്നുണ്ട്. കോൺഗ്രസ് ഓഫീസിനു നേരെയുണ്ടായ അക്രമത്തിൽ പ്രതിഷേധിച്ച് ഇന്ന് വൈകീട്ട് അഞ്ചിന് പ്രതിഷേധ മാർച്ചും സമ്മേളനവും നടത്താനാണ് കോൺഗ്രസിന്റെ തീരുമാനം.