ശമ്പളം മുടങ്ങിയതിനെതിരെ തലകുത്തിനിന്ന് കെ.എസ്.ആർ.ടി.സി ജീവനക്കാരന്റെ പ്രതിഷേധം

ഇടുക്കി: ശമ്പളം ലഭിക്കാത്തതിനെ തുടർന്ന് കെ.എസ്.ആർ.ടി.സി ജീവനക്കാരന്റെ വേറിട്ട പ്രതിഷേധം. മൂന്നാർ ഡിപ്പോയിലെ ഡ്രൈവറും അടിമാലി സ്വദേശിയുമായ കെ.എസ് ജയകുമാറാണ് തലകുത്തിനിന്ന് പ്രതിഷേധിച്ചത്. ഇന്നലെ മൂന്നാർ ഡിപ്പോയിലാണ് ജയകുമാറിന്റെ അരമണിക്കൂർ പ്രതിഷേധം നടന്നത്. പ്ലക്കാർഡുകളേന്തി സഹപ്രവർത്തകരായ ഗിരീഷും ബിജുമോനും പ്രതിക്ഷേധത്തിൽ പങ്കെടുത്തു.

മൂന്നാർ - ഉദുമൽപേട്ട ബസിലെ ഡ്രൈവറാണ് ജയകുമാർ. 13-ാം തീയതിയായിട്ടും ശമ്പളം ലഭിക്കാത്തതിൽ പ്രതിഷേധിച്ചായിരുന്നു ജയകുമാറിന്റെ സമരം. ബി.എം.എസ് എംപ്ലോയീസ് സംഘ് ജില്ലാ വർക്കിങ് പ്രസിഡന്റും ആയോധന കലയിൽ പ്രാവിണ്യമുള്ളയാളുമാണ് ജയകുമാർ.

Full View