മലബാർ വിപ്ലവത്തിലെ രക്തരൂഷിത അധ്യായം; പൂക്കോട്ടൂർ യുദ്ധത്തിന്​ നൂറു​ വയസ്സ്

ഇന്ത്യൻ സ്വാതന്ത്ര്യ സമര ചരിത്രത്തിലെ സുപ്രധാന പോരാട്ടങ്ങളിലൊന്നായ 1921 ആഗസ്​റ്റ്​ 26ലെ പൂക്കോട്ടൂർ യുദ്ധത്തിന് നൂറു വയസ് തികയുന്നു. കരുത്തരായ ബ്രിട്ടീഷ് സൈന്യത്തോട് കൈയിൽ കിട്ടിയ ആയുധങ്ങളുമായി മാപ്പിള പോരാളികൾ ഏറ്റുമുട്ടിയ തുല്യതയില്ലാത്ത സമരചരിത്രമാണ് പൂക്കോട്ടൂർ യുദ്ധത്തിന് പറയാനുള്ളത്. 

കോഴിക്കോടു​ നിന്ന്​ മലപ്പുറത്തേക്കു​ വന്ന ലെയിൻസ്​റ്റർ റെജിമെൻറിലെ നൂറുപേരും മലബാർ സ്​പെഷൽ ഫോഴ്​സിലെ 28 പൊലീസുകാരുമടങ്ങിയ ബ്രിട്ടീഷ്​ പട്ടാളത്തോട്​ 350 ഓളം വരുന്ന മാപ്പിള പോരാളികൾ ഗറില്ല യുദ്ധമുറയിൽ നടത്തിയ ചെറുത്തുനിൽപായിരുന്നു​ പൂക്കോട്ടൂർ യുദ്ധം. ബ്രിട്ടീഷ് അധിനിവേശ ശക്തികൾ തന്നെ യുദ്ധമെന്ന് വിശേഷിപ്പിച്ച അപൂർവങ്ങളിൽ ഒന്ന്.

ആഗസ്​റ്റ്​ 26ന്​ പുലർച്ചെ കൊണ്ടോട്ടിയിൽ നിന്ന്​ പുറപ്പെട്ട പട്ടാളത്തെ നേരിടാൻ പൂക്കോട്ടൂരിനും പിലാക്കലിനുമിടയിൽ ദേശീയപാതയുടെ ഇരുവശത്തുമുള്ള നെൽപാടത്ത്​ മാപ്പിള പോരാളികൾ ഒളിഞ്ഞിരുന്നു. സൈന്യം പൂക്കോട്ടൂർ അങ്ങാടിയിൽ നിന്ന്​ നീങ്ങാൻ തുടങ്ങിയപ്പോഴാണ്​ ആദ്യ വെടി​പൊട്ടിയത്​. ഇതോടെ അപകടം മണത്ത ബ്രിട്ടീഷ്​ സൈനിക വ്യൂഹം അവിടെ നിന്നു. പിന്നീട് പുക​ ബോംബെറിഞ്ഞ ശേഷം സ്​റ്റോക്​സ്​ മോർട്ടാർ പീരങ്കികളും ലൂയിസ്​ ഗണ്ണുകളും കൊണ്ട് സൈന്യം,​​ മാപ്പിള പോരാളികളെ നേരിട്ടു​. അഞ്ചു മണിക്കൂറോളം നീണ്ട പോരാട്ടത്തിൽ യുദ്ധനായകനും പൂക്കോട്ടൂർ ഖിലാഫത്ത്​ കമ്മിറ്റി സെക്രട്ടറിയുമായ വടക്കുവീട്ടിൽ മുഹമ്മദ്​ ഉൾപ്പെടെ 257 പോരാളികളാണ്​ രക്തസാക്ഷികളായത്​.

ബ്രിട്ടീഷ്​ പക്ഷത്ത്​ എ.എസ്​.പി സി.ബി. ലങ്കാസ്​റ്ററുൾപ്പെടെ മൂന്നുപേർ​ കൊല്ലപ്പെ​ട്ടെന്നാണ്​​ ബ്രിട്ടീഷ്​ ഭരണകൂടം അവകാശപ്പെട്ടത്​. എന്നാൽ ബ്രിട്ടീഷ്​ സേനക്ക്​ വൻതോതിൽ നാശമുണ്ടായെന്നതാണ് വസ്തുത. ലെയിൻസ്​റ്റർ റെജിമെൻറിലെ 70 സൈനികരെയും 17 പൊലീസുകാരെയും കാണാനില്ലെന്നും ഒ​ട്ടേറെ യൂറോപ്യന്മാർ കൊല്ലപ്പെട്ടതായും​ ആഗസ്​റ്റ്​ 29നും 30നുമായി​ അമേരിക്കൻ പത്രങ്ങളായ ബഫലോ ടൈംസ്​, ദ യോർക്​ ഡെസ്​പാച്ച്​, ബോസ്​റ്റൺ ഗ്ലോബ്​, വിൽക്​സ്​ ബാരി റെക്കോഡ്​ എന്നിവ റിപ്പോർട്ട്​ ചെയ്​തു. ഇതുപ്രകാരം 1857ലെ ഒന്നാം സ്വാതന്ത്ര്യ സമരത്തിനു​ ശേഷം ബ്രിട്ടീഷ്​ സൈന്യത്തിന്​ ഏറെ ആഘാതമേൽപിച്ച സൈനിക നീക്കങ്ങളിലൊന്നാണ് പൂക്കോട്ടൂർ യുദ്ധം. 

യുദ്ധത്തിൽ ഒരു മാപ്പിള സ്​ത്രീ രക്തസാക്ഷിയായതായി റോയൽ ആർമി മെഡിക്കൽ കോർപ്​സി​ന്‍റെ ക്യാപ്​റ്റൻ സുള്ളിവൻ സാക്ഷ്യപ്പെടുത്തിയിരുന്നു. ഒരുപക്ഷേ, ഇന്ത്യൻ സ്വാതന്ത്ര്യ സമരത്തിൽ ബ്രിട്ടീഷ്​ സേനയുമായി നേരിട്ട്​ ഏറ്റുമുട്ടി വീരമൃത്യു വരിച്ച അപൂർവ വനിതകളിലൊരാളാണ്​ പൂക്കോട്ടൂരിലെ ഈ 'അജ്ഞാത' സ്​ത്രീ. 

യുദ്ധശേഷം ഒക്​ടോബർ, നവംബർ മാസങ്ങളിലായി ഈ പ്രദേശത്താകമാനം ബ്രിട്ടീഷ്​ പട്ടാളം നരനായാട്ട് നടത്തിയിരുന്നു. അന്ന്​ പിടികൂടിയവരെ മലപ്പുറം കോട്ടപ്പടി മൈതാനിയിൽ സമ്മറി കോടതിയെന്നറിയപ്പെടുന്ന പ്രത്യേക പട്ടാള കോടതിയാണ് കൂട്ടത്തോടെ വിചാരണ ചെയ്തത്. പോരാളികളെ തമിഴ്​നാട്ടിലെ കോയമ്പത്തൂർ, കർണാടകയിലെ ബെള്ളാരി, ആന്ധ്രപ്രദേശിലെ രാജമുന്ദ്രി ജയിലുകളിലേക്കും അന്തമാനിലെ സെല്ലുലാർ ജയിലിലേക്കുമയച്ചു. ചിലരെ തൂക്കിലേറ്റുകയും മറ്റുചിലരെ ​വെടിവെച്ചുകൊല്ലുകയും ചെയ്​തു.

പൂക്കോട്ടൂർ ഖിലാഫത്ത് മെമ്മോറിയൽ യതീംഖാന, 1921 പൂക്കോട്ടൂർ യുദ്ധസ്മാരക ഗേറ്റ് അറവങ്കര, പിലാക്കലിലെ പൂക്കോട്ടൂർ രക്തസാക്ഷികളുടെ അഞ്ച് മഖ്ബറകൾ എന്നിവ സ്മാരകമായി പൂക്കോട്ടൂരിലും പരിസരപ്രദേശങ്ങളിലും ഇന്ന് തലയുയർത്തി നിൽക്കുന്നുണ്ട്. അധിനിവേശ വിരുദ്ധ പോരാട്ടത്തിന്റെ ജ്വലിക്കുന്ന ഓർമയായ ഈ പോരാട്ടത്തെ ചരിത്രപുസ്തകങ്ങള്‍ ബോധപൂർവം വിസ്മരിക്കുകയാണെന്നും മതഭ്രാന്തന്മാരുടെ ലഹളയായും കലാപമായും ചിത്രീകരിക്കപ്പെടുമ്പോള്‍ യഥാര്‍ഥ ചരിത്രം പുറത്തുകൊണ്ടുവരുക ശ്രമകരമാണെന്നുമാണ് പുതുതലമുറ ചരിത്രകാരന്മാർ വിലയിരുത്തുന്നത്.