പള്ളുരുത്തി കടേ ഭാഗത്ത് ആക്രമണത്തിൽ പരിക്കേറ്റ ദമ്പതിമാരിൽ ഒരാൾ മരിച്ചു; മുൻവൈരാഗ്യമെന്ന് സൂചന

എറണാകുളം: പള്ളുരുത്തി കടേ ഭാഗത്ത് ആക്രമണത്തിൽ പരിക്കേറ്റ ദമ്പതിമാരിൽ ഒരാൾ മരിച്ചു. 60 വയസുള്ള സരസ്വതിയാണ് മരിച്ചത്. ഗുരുതരമായി പരിക്കേറ്റ ഭർത്താവ് ചികിത്സയിലാണ്. മുൻവൈരാഗ്യമാണ് ആക്രമണത്തിന് പിന്നിലെന്നാണ് സൂചന. ജയൻ എന്നയാളാണ് സരസ്വതിയേയും ഭർത്താവ് ധർമനേയും വീട്ടിൽ കയറി വെട്ടിയത്.

ആറ് വർഷം മുമ്പ് ജയന്റെ ഭാര്യയെ ആക്രമണത്തിനിരയായ ദമ്പതികളുടെ മകൻ കുത്തിക്കൊലപ്പെടുത്തിയിരുന്നു. ഇതിന്റെ വൈരാഗ്യമാണ് കൊലപാതകത്തിന് കാരണം. കുത്തേറ്റ സരസ്വതി അയൽവീടിന്റെ അടുക്കളയിലേക്ക് ഓടിക്കയറിയെങ്കിലും അവിടെയിട്ട് കുത്തിക്കൊലപ്പെടുത്തുകയായിരുന്നു. പരിക്കേറ്റ ധർമന്റെ നില ഗുരുതരമായി തുടരുകയാണ്.