ഇടുക്കിയിൽ എയർഗൺ ഉപയോഗിച്ച് യുവാവിനെ വെടിവെച്ചു
വാഹനം സൈഡ് നല്‍കുന്നതുമായി ബന്ധപ്പെട്ടുണ്ടായ വാക്കുതര്‍ക്കമാണ് വെടിവയ്പ്പില്‍ കലാശിച്ചത്
Update: 2022-02-19 01:32 GMT
ഇടുക്കി ശാന്തൻപാറയിൽ എയർഗൺ ഉപയോഗിച്ച് യുവാവിനെ വെടിവെച്ചു. സൂര്യനെല്ലി സ്വദേശി മൈക്കിൾ രാജിനാണ് വെടിയേറ്റത്. വെടിയുതിർത്ത ബി എൽ റാവ് സ്വദേശി കരിപ്പക്കാട്ട് ബിജു വർഗ്ഗിസിനെ ശാന്തൻപാറ പൊലീസ് കസ്റ്റഡിയിൽ എടുത്തു. ഇരുവരും തമ്മിലുണ്ടായ വാക്കുതർക്കമാണ് വെടിയുതിർക്കാൻ കാരണം. മൈക്കിളിനെ നെടുക്കണ്ടം താലൂക്ക് ആശുപത്രിയിൽ പ്രേവേശിപ്പിച്ചു.
പരിക്കേറ്റ മൈക്കിള്‍ രാജിനും വെടിയുതിര്‍ത്ത ബിജുവിനും ബി എല്‍ റാമില്‍ ഏലത്തോട്ടമുണ്ട്. ഇന്നലെ വൈകിട്ടോടെ തോട്ടത്തിലെത്തിയ ഇരുവരും വാഹനം സൈഡ് നല്‍കുന്നതുമായി ബന്ധപ്പെട്ടുണ്ടായ വാക്കുതര്‍ക്കമാണ് വെടിവയ്പ്പില്‍ കലാശിച്ചത്.ബിജുവിന്റെ വാഹനത്തിന് പുറകില്‍ സൂക്ഷിച്ചിരുന്ന എയര്‍ഗണ്‍ എടുത്ത് വെടി ഉതിർക്കുകയായിരുന്നു. മൈക്കിള്‍ രാജിന്റെ വയറിനാണ് വെടിയേറ്റത്.
ഇയാള്‍ക്കൊപ്പമുണ്ടായിരുന്ന ആള്‍ നാട്ടുകാരെ വിവരമറിയിക്കുകയും പിന്നീട് ആശുപത്രിയിലേയ്ക്ക് മാറ്റുകയുമായിരുന്നു. പരിക്കേറ്റ മൈക്കിള്‍ രാജ് കട്ടപ്പനയിലെ സ്വകാര്യ ആശുപത്രിയിൽ ചികിൽസയിലാണ്. പരിക്ക് ഗുരുതരമല്ലെന്നാണ് വിവരം. സംഭവത്തിനു ശേഷം വാഹനത്തില്‍ രക്ഷപ്പെടാന്‍ ശ്രമിക്കുന്നതിനിടെ ബിജുവിനെ ശാന്തൻപാറ പൊലീസ് കസ്റ്റഡിയിലെടുക്കുകയായിരുന്നു.