പൊലീസ് ഉദ്യോഗസ്ഥന്റെ വീട്ടിൽ യുവാവിനെ മരിച്ച നിലയിൽ കണ്ടെത്തി

ആലപ്പുഴ: പൊലീസ് ഉദ്യോഗസ്ഥന്റെ വീട്ടിൽ യുവാവിനെ മരിച്ച നിലയിൽ കണ്ടെത്തി. ആലപ്പുഴ തൃക്കുന്നപ്പുഴ സ്വദേശിയായ സൂരജാണ് മരിച്ചത്. ആലപ്പുഴ കനകക്കുന്ന് സ്റ്റേഷനിലെ എഎസ്ഐ സുരേഷിന്‍റെ കുടുംബവീട്ടിലാണ് സൂരജിന്റെ മൃതദേഹം കണ്ടത്.

ഇന്നലെ രാത്രി സൂരജ് ഈ വീട്ടിലെത്തി എഎസ്ഐയുടെ അമ്മയുമായും സഹോദരനുമായും സംസാരിച്ചിരുന്നു. പുലർച്ചെയാണ് വീടിന് സമീപത്തെ ഷെഡിൽ ഇയാളെ മരിച്ച നിലയിൽ കണ്ടെത്തിയത്. തുടർന്ന് അയൽവാസികളെയും പൊലീസിനെയും വിവരമറിയിക്കുകയായിരുന്നു. ഈ സമയം എ.എസ്.ഐ വീട്ടിൽ ഉണ്ടായിരുന്നില്ല.  ഇന്നലെ രാത്രിയിൽ സൂരജും എ.എസ്.ഐയുടെ കുടുംബവുമായി വാക്കേറ്റമുണ്ടായിരുന്നെന്നും അയൽവാസികൾ പറയുന്നു.

സംഭവത്തിൽ പൊലീസ് കേസെടുത്ത് അന്വേഷണം തുടങ്ങിയിട്ടുണ്ട്. സൂരജിന്റെ മൃതദേഹം വണ്ടാനം മെഡിക്കൽ കോളജിലേക്ക് മാറ്റി.