ഹിറ്റ് വിക്കറ്റ്: ആഗ്രഹങ്ങളുടെ അന്തസ്സും ദുഃഖത്തിന്റെ ഭംഗിയും

സന്താനു സാഹയുടെ 'ഹിറ്റ് വിക്കറ്റ്' എന്ന ബംഗാളി ചെറുചിത്രം ജീവിതത്തിലെ ആഗ്രഹങ്ങളും പരാജയങ്ങളും അതിജീവനവും ആഴത്തില്‍ അന്വേഷണവിധേയമാക്കുന്ന ഒരു കലാസൃഷ്ടിയാണ്. കഥ, ക്രിക്കറ്റ് താരമാകാന്‍ ആഗ്രഹിക്കുന്ന നായകന്റെ ജീവിതത്തെ കേന്ദ്രീകരിക്കുന്നതിനാല്‍, അത് പ്രേക്ഷകരെ അവരുടെ തന്നെ ജീവിതാനുഭവങ്ങളിലേക്ക് കൊണ്ടുപോകുന്നു. ക്രിക്കറ്റിന്റെ ലോകത്ത് എത്താനുള്ള താരത്തിന്റെ ശ്രമവും വഴിയിലുണ്ടാകുന്ന പ്രതിബന്ധങ്ങളും അവനെ എങ്ങനെ മാറ്റുന്നുവെന്നതാണ് ചിത്രത്തിന്റെ മജ്ജ.

ചിത്രത്തിന്റെ ആദ്യംമുതല്‍, നായകന്റെ ഉള്ളിലെ പ്രതീക്ഷകളുടേയും നിരാശകളുടേയും സംഘര്‍ഷങ്ങള്‍ ഫ്‌ളാഷ്ബാക്കിലൂടെ അവതരിപ്പിക്കുന്നു. ക്രിക്കറ്റിനെ മാത്രം ജീവിതമാക്കി കാണുന്ന അവന്റെ മനസ്സിലെ ആഗ്രഹങ്ങളും പരാജയങ്ങളും ദൃശ്യങ്ങളിലൂടെ തുറന്നു കാട്ടുന്നു. നായകന്‍ കടന്നുപോകുന്ന ഓരോ പരീക്ഷണ ഘട്ടവും ജീവിതവിശകലനമായി സിനിമ നമ്മളെ ബോധ്യപ്പെടുത്തുന്നു. ക്രിക്കറ്റിനോടുള്ള അഭിനിവേശം മാത്രമല്ല, ജീവിതത്തെ അതിന്റെ നിഗൂഡമായ സങ്കീര്‍ണതയോടും നിരാശയോടും ചേര്‍ത്തുകാണുന്നു എന്നതാണ് ചിത്രത്തിന്റെ സവിശേഷത.

ചിത്രത്തില്‍ നടന്റെ പ്രകടനം വളരെ ശ്രദ്ധേയമാണ്. കഥാപാത്രത്തിന്റെ മനസ്സിലെ ആവേശവും നിരാശയും മികച്ച രീതിയിലാണ് അവതരിപ്പിച്ചിരിക്കുന്നത്. അവന്‍ സ്വന്തം പരാജയങ്ങളെ പ്രതിസന്ധിയാകാതെ, ആഗ്രഹത്തിന്റെ പിന്നിലെ സത്യത്തെ കണ്ടെത്താന്‍ ശ്രമിക്കുന്നത് പ്രേക്ഷകരുടെ മനസ്സിനെ ആഴത്തില്‍ സ്പര്‍ശിക്കും. ക്രിക്കറ്റിലൂടെയും ജീവിതത്തിലൂടെയും വെല്ലുവിളികളെ എങ്ങനെ അഭിമുഖീകരിക്കാമെന്നതിന്റെ പ്രചോദനമാണ് അവന്‍ പ്രേക്ഷകര്‍ക്ക് നല്‍കുന്നത്. ഇത് സ്വയം തിരിച്ചറിയലിലേക്ക് നയിക്കുന്നു, ഒടുവില്‍ ആത്മവിശ്വാസത്തിന്റെ കാതല്‍ കണ്ടെത്തുന്നു.   

ഹിറ്റ് വിക്കറ്റ് 2024-ലെ ബംഗാള്‍ അന്താരാഷ്ട്ര ചെറുചിത്രമേളയില്‍ (BISFF) ഔദ്യോഗികമായി തെരഞ്ഞെടുക്കപ്പെട്ടിട്ടുണ്ട്. ഒരു മികവുറ്റ കലാസൃഷ്ടി തന്നെയാണ് ചിത്രം. സിനിമയിലെ ദൃശ്യങ്ങളും സംഗീതവും കഥയുടെ ആത്മാവുമായി വളരെയധികം ചേര്‍ന്നുനില്‍ക്കുന്നു.

ചിത്രത്തിലെ സംഗീതം, നായകന്റെ മാനസികാവസ്ഥയെ പ്രതിഫലിപ്പിക്കുന്നതില്‍ വലിയ പങ്കാണ് വഹിക്കുന്നത്. സംഗീതത്തിലെ ചില നിമിഷങ്ങള്‍, ദൃശ്യങ്ങളോടൊപ്പം, പ്രേക്ഷകര്‍ക്ക് ദുഃഖവും പ്രതീക്ഷയും ഉള്‍ക്കൊള്ളുന്ന അനുഭവങ്ങള്‍ നല്‍കുന്നു. ഓരോ രംഗവും, വ്യക്തിപരമായ ഒരു അനുഭവത്തിന്റെ പ്രതീകം പോലെയാണെന്ന് തോന്നിപ്പിക്കുന്നു. അത് പ്രേക്ഷകരില്‍ ദുഃഖവും പ്രതീക്ഷയും ഒരുപോലെ ഉണര്‍ത്തുന്നു. സാഹസികതയെയും പ്രതിസന്ധിയെയും ശരിയായ രീതിയില്‍ അനാവരണം ചെയ്തുകൊണ്ട് ചിത്രം, ക്രിക്കറ്റും ജീവിതവും തമ്മിലുള്ള ആത്മബന്ധത്തെ ആവിഷ്‌കരിക്കുന്നു.

ഹിറ്റ് വിക്കറ്റ് വിജയത്തിന്റെയും പരാജയത്തിന്റെയും അസാമാന്യമായ പ്രകടനമാണ്. ചിത്രത്തിലെ നായകന്‍ സംഘര്‍ഷഭരിതമായ യുവത്വത്തിന്റെ പ്രതിനിധിയായി മാറുന്നു. വിദ്യഭ്യാസ സ്ഥാപനങ്ങളിലെ അധ്യാപകരുടെ സമീപനം സിനിമയില്‍ സൂക്ഷ്മമായി ദൃശ്യവത്കരിക്കുന്നുണ്ട്. വിദ്യാര്‍ഥികളായ യുവാക്കളുടെ ആഗ്രഹങ്ങളെ അവര്‍ എത്രത്തോളം മാനിക്കുന്നു എന്ന ചോദ്യത്തിന് സിനിമ ഉത്തരം നല്‍കുന്നു. മാതാപിതാക്കള്‍ പങ്കുവെക്കുന്ന പ്രത്യാശകള്‍ സിനിമയെ കൂടുതല്‍ സങ്കീര്‍ണതയിലേക്കാണ് നയിക്കുന്നത്. സ്വപ്നങ്ങള്‍ ആവിഷ്‌കരിക്കാന്‍ അവര്‍ക്കു വേണ്ടതായ പിന്തുണ ലഭിക്കാറുണ്ടോ എന്ന ചോദ്യം സനിമയുടെ അന്തരീക്ഷത്തില്‍ തങ്ങിനില്‍ക്കുന്നു.

വിദ്യാഭ്യാസ സംവിധാനത്തിന്റെ വെല്ലുവിളികളും, കുട്ടികളുടെ കലാപരമായ കഴിവുകളെ സമൂഹം എങ്ങനെ നോക്കിക്കാണുന്നു എന്നും ചിത്രത്തിലൂടെ ചര്‍ച്ചയാകുന്നു. അധ്യാപകരും രക്ഷിതാക്കളും തമ്മിലുള്ള ബന്ധങ്ങളുടെ ഇഴയടുപ്പം സിനിമയുടെ പശ്ചാത്തലത്തില്‍ കാണാം. ഈ സിനിമ വിദ്യാര്‍ഥികളുടെ കഴിവുകളെ പരിപോഷിപ്പിക്കാനായി സമൂഹം എത്രത്തോളം പ്രവര്‍ത്തിക്കണം എന്നതിനെ ഒരു ചോദ്യമായി ഉയര്‍ത്തുന്നു.

ഹിറ്റ് വിക്കറ്റ്, ജീവിതത്തിലെ ഓരോ നിമിഷവും പ്രതീക്ഷകളെ മുന്‍നിര്‍ത്തി എങ്ങനെ ചെറുത്തുനില്‍ക്കാം എന്നതിന്റെ മാതൃകയാണ്. യൗവനത്തിലെ അഭിലാഷങ്ങള്‍ നിറവേറ്റുന്നതിന് അധ്യാപകരും മാതാപിതാക്കളും നല്‍കേണ്ട പിന്തുണയുടെ പ്രാധാന്യം 'ഹിറ്റ് വിക്കറ്റ്' ചര്‍ച്ച ചെയ്യുന്നു. ഇത്തരം അനുഭവങ്ങള്‍ നമ്മുടെ സമൂഹത്തില്‍ ഇന്നും പ്രാധാന്യമര്‍ഹിക്കുന്ന വിഷയങ്ങളാണെന്ന് ചിത്രം ഓര്‍മപ്പെടുത്തുന്നു.

ഹിറ്റ് വിക്കറ്റ് ഒരു അസാധാരണമായ അനുഭവമാണ്. ദൃശ്യപരതയിലൂടെ സങ്കീര്‍ണമായ മനുഷ്യവികാരങ്ങളെ പ്രേക്ഷകര്‍ക്ക് നല്‍കുന്ന ചിത്രം ഓരോ നിമിഷത്തിലും പുതിയ ചിന്തകള്‍ക്കും അനുഭവങ്ങള്‍ക്കും വഴിവെക്കുന്നു.

Santanu Saha

hit wicket