പൊലീസുമായി ഏറ്റുമുട്ടല്‍; വിശാഖപട്ടണത്ത് ആറ് മാവോയിസ്റ്റുകള്‍ കൊല്ലപ്പെട്ടു
പ്രദേശത്ത് മാവോയിസ്റ്റുകൾ എത്തിയെന്ന വിവരം ലഭിച്ചതിനെ തുടർന്ന് കോമ്പിംഗ് ഓപറേഷൻ നടത്തുന്നതിനിടയിലാണ് ഏറ്റുമുട്ടലുണ്ടായത്.
Update: 2021-06-16 09:33 GMT
ആന്ധ്രാപ്രദേശിൽ പൊലീസുമായുണ്ടായ ഏറ്റുമുട്ടലിൽ ആറ് മാവോയിസ്റ്റുകൾ കൊല്ലപ്പെട്ടതായി റിപ്പോര്‍ട്ട്. വിശാഖപട്ടണം കോയൂരു മാമ്പ പൊലീസ് സ്റ്റേഷന് സമീപമാണ് ഏറ്റുമുട്ടലുണ്ടായത്. സംഭവസ്ഥലത്തു നിന്ന് എ.കെ 47 ഉൾപ്പടെയുള്ള ആയുധങ്ങൾ കണ്ടെത്തിയതായി പൊലീസ് അവകാശപ്പെട്ടു.
പ്രദേശത്ത് മാവോയിസ്റ്റുകൾ എത്തിയെന്ന വിവരം ലഭിച്ചതിനെ തുടർന്ന് പൊലീസ് കോമ്പിംഗ് ഓപറേഷൻ നടത്തുന്നതിനിടയിലാണ് ഏറ്റുമുട്ടലുണ്ടായത്. ഇന്നു പുലര്‍ച്ചെയായിരുന്നു സംഭവം. വെടിവെപ്പിൽ എത്ര പേർക്ക് പരിക്കേറ്റുവെന്ന് ഇതുവരെ കണ്ടെത്തിയിട്ടില്ല. നിബിഡ വനമേഖലയായതിനാൽ വിശദാംശങ്ങൾ അറിയാൻ സമയമെടുക്കുമെന്ന് കോയൂരു സി.ഐ വെങ്കടരാമൻ പറഞ്ഞു.
രക്ഷപ്പെട്ട മറ്റ് മാവോയിസ്റ്റുകൾക്കായി പൊലീസ് ഹെലികോപ്റ്റർ ഉപയോഗിച്ച് കാടിനുള്ളിൽ തിരച്ചിൽ നടത്തിയതായും വിവരമുണ്ട്. കൂടുതൽ സേനയെ ഉൾപ്പെടുത്തി പ്രദേശത്ത് കോമ്പിംഗ് തുടരുകയാണെന്നും പൊലീസ് വൃത്തങ്ങള്‍ അറിയിച്ചു.