എട്ട്​ വർഷത്തിന്​ ശേഷം വിമതർ വീണ്ടും അലപ്പോയിൽ; സിറിയയിൽ സംഘർഷം രൂക്ഷം

ഡമസ്​കസ്​: സിറിയയിൽ വീണ്ടും സംഘർഷം രൂക്ഷമാകുന്നു. വിമത വിഭാഗം വടക്കുപടിഞ്ഞാറൻ നഗരമായ അലപ്പോയിലേക്ക്​ ഇരച്ചുകയറി. സൈനിക വൃത്തങ്ങളെ ഉദ്ധരിച്ചുകൊണ്ട്​ റോയി​ട്ടേഴ്​സാണ്​ വാർത്ത റിപ്പോർട്ട്​ ചെയ്​തത്​. പ്രസിഡൻറ്​ ബഷർ അൽ അസദിന്​ വർഷങ്ങൾക്കിടെയുണ്ടാകുന്ന ഏറ്റവും വലിയ തിരിച്ചടിയായിട്ടാണ്​ ഇതിനെ കണക്കാക്കുന്നത്​​. സംഭവത്തിന്​ പിന്നാലെ സിറിയൻ അധികൃതർ അലപ്പോ വിമാനത്താവളവും നഗരത്തിലേക്കുള്ള റോഡുകളും അടച്ചു.

ഹയാത്ത്​ തഹ്​രീർ അൽ ഷാം എന്നി സായുധ വിഭാഗമാണ്​ അപ്രതീക്ഷിത ആക്രമണം നടത്തിയത്​. അതേസമയം, സിറിയയുടെ പ്രധാന സഖ്യകക്ഷിയായ റഷ്യ, വിമതരെ തുരത്താനുള്ള എല്ലാവിധ സഹായങ്ങളും നൽകുമെന്ന്​ അറിയിച്ചു.

ബുധനാഴ്​ചയാണ്​ വിമതസേന അലപ്പോയിലേക്കുള്ള കടന്നുകയറ്റം ആരംഭിച്ചത്​. വെള്ളിയാഴ്​ചയോടെ നഗരത്തി​െൻറ പ്രധാന ഭാഗങ്ങൾ ഇവർ കീഴടക്കി. 2016ന്​ ശേഷം ആദ്യമായാണ്​ ഇവർ നഗരത്തിലേക്ക്​ തിരിച്ചെത്തുന്നത്​. ഇറാ​െൻറയും റഷ്യയുടെയും ഷിഈ സായുധവിഭാഗങ്ങളുടെയും സഹായത്തോടെ വിമതരെ സിറിയ അന്ന്​ തുരത്തുകയായിരുന്നു.

ഇറാൻ പിന്തുണയുള്ള സൈനികരുടെ കുറവാണ്​ വിശാലമായ അലപ്പോ ​പ്രവിശ്യയിലേക്ക്​ തങ്ങൾക്ക്​ കടന്നുകയറാൻ സഹായകരമായതെന്ന്​ വിമത വിഭാഗത്തി​ലെ കമാൻഡർ മുസ്​തഫ അബ്​ദുൽ ജബ്ബാർ പറഞ്ഞു. വിമതരുടെ നിയന്ത്രണത്തിലുള്ള ഇദ്​ലിബിൽ കഴിഞ്ഞ ആഴ്​ചകളിൽ റഷ്യയുടെയും സിറിയയുടെയും വ്യോമസേനകൾ ആക്രമണം നടത്തിയിരുന്നു. ഇതിന്​ മറുപടിയായിട്ടാണ്​ തങ്ങളുടെ കടന്നാക്രമണമെന്നും വിമതർ വ്യക്​തമാക്കി.

വിമതരെ പിന്തുണക്കുന്ന തുർക്കി ആക്രമണത്തിന്​ പച്ചക്കൊടി കാണിച്ചാതയും റിപ്പോർട്ടുകളുണ്ട്​. അതേസമയം, മേഖലയിൽ കൂടുതൽ അസ്​ഥിര ഒഴിവാക്കാനാണ്​ തുർക്കി ശ്രമിക്കുന്നതെന്നും ഇത്തരം ആക്രമണങ്ങൾ സമാധാന കരാറിന്​ തുരങ്കം വെക്കുന്നതാണെന്ന്​ മുന്നറിയിപ്പ്​ നൽകിയിട്ടുണ്ടെന്നും തുർക്കി​ വിദേശകാര്യ മന്ത്രാലയം വക്​താവ്​ ഓ​ങ്കു കെസെലി പറഞ്ഞു. 2020 മാർച്ചിൽ റഷ്യയും തുർക്കിയും സംഘർഷം ലഘൂകരിക്കാനുള്ള കരാറിന്​ സമ്മതിച്ചിരുന്നു. ഇതിന്​ ശേഷമുള്ള ഏറ്റവും വലിയ ആക്രമണമാണ്​ ഇപ്പോൾ നടന്നിട്ടുള്ളത്​.

അതേസമയം, വിമതർ അലപ്പോ നഗരത്തിൽ എത്തിയെന്ന വാർത്ത സിറിയൻ ദേശീയ ടെലിവിഷൻ നിഷേധിച്ചു. റഷ്യയുടെ സഹായത്തോടെ വിമതരെ ചെറുക്കുന്നുണ്ടെന്നും സിറിയ വ്യക്​തമാക്കി. ആക്രമണത്തിനെതിരെ പോരാടുകയാണെന്നും അലപ്പോയിലെയും ഇദ്​ലിബിലെയും ഗ്രാമപ്രദേശങ്ങളിൽ വിമതർക്ക്​ കനത്ത നാശം വരുത്തിയെന്നും സിറിയൻ സൈന്യം പറയുന്നു.

വടക്കുപടിഞ്ഞാറൻ സിറിയയിലെ സ്​ഥിതിഗതികളിൽ തങ്ങൾ അഗാധമായ ആശങ്കയിലാണെന്ന്​ രാജ്യത്തെ ഐക്യരാഷ്​ട്ര സഭ പ്രതിനിധി ഡേവിഡ്​ കാർഡൻ വ്യക്​തമാക്കി. കഴിഞ്ഞ മൂന്ന്​ ദിവസത്തിനിടെ എട്ട്​ വയസ്സുകാരൻ ഉൾ​പ്പെടെ 27 സാധാരണക്കാരാണ്​ കൊല്ലപ്പെട്ടതെന്നും അദ്ദേഹം കൂട്ടിച്ചേർത്തു.

വിമതർക്കെതിരെ റഷ്യയും രംഗത്തുവന്നു. വിമതരുടേത്​ സിറിയയുടെ പരമാധികാരത്തിനുമേലുള്ള ആക്രമണമായാണ്​ കണക്കാക്കുന്ന​തെന്ന്​ റഷ്യൻ വക്​താവ്​ ദിമിത്രി പെസ്​കോവ്​ വ്യക്​തമാക്കി. സിറിയൻ സർക്കാറിന്​ ആവശ്യമായ എല്ലാ പിന്തുണയും അദ്ദേഹം വാഗ്​ദാനം ചെയ്​തു.