‘വടക്കൻ ഗസ്സയിൽ കീഴടങ്ങാത്ത എല്ലാവരെയും കൊല്ലണം’; പ്രതിരോധ മന്ത്രിക്ക്​ കത്തയച്ച്​ ഇസ്രായേൽ പാർലമെൻറ്​ അംഗങ്ങൾ

തെൽ അവീവ്​: ഗസ്സയിൽ ഇസ്രായേൽ സൈന്യം നടത്തുന്ന ആക്രമണത്തി​െൻറ തീവ്രത വർധിപ്പിക്കണമെന്ന ആവശ്യവുമായി ഇസ്രായേലി നിയമനിർമാണ സഭയായ നെസെറ്റിലെ തീവ്ര വലതുപക്ഷ അംഗങ്ങൾ. നെസെറ്റി​െൻറ വിദേശകാര്യ, പ്രതിരോധ കമ്മിറ്റിയിലെ എട്ട്​ അംഗങ്ങളാണ്​ ഇതുസംബന്ധിച്ച്​ പ്രതിരോധ മന്ത്രി ഇസ്രായേൽ കാറ്റ്​സിനോട്​ ആവശ്യമുന്നയിച്ചത്​.

വടക്കൻ ഗസ്സയിൽനിന്ന്​ മുഴുവൻ ആളുകളെയും ഒഴിപ്പിച്ച്​ എല്ലാ കുടിവെള്ള, ഭക്ഷണ സ്രോതസ്സുകളും നശിപ്പിക്കണം. ഇന്ധനം, സോളാർ സംവിധാനങ്ങൾ, ജനറേറ്ററുകൾ, പവർ ലൈനുകൾ തുടങ്ങി എല്ലാ വൈദ്യുതി സ്രോതസ്സുകൾ തകർക്കാനും ഉത്തരവിടണം. കീഴടങ്ങാൻ സന്നദ്ധരാവാത്ത പുരുഷൻമാരെയും സ്​ത്രീകളെയും കുട്ടികളെയും കൊല്ലണമെന്നും അംഗങ്ങൾ ആവശ്യപ്പെടുന്നു.

ഭരണകക്ഷിയായ ലിക്കുഡ്​ പാർട്ടി, സഖ്യകക്ഷികളായ റിലീജിയസ്​ സയണിസം, ജ്യൂയിഷ്​ പവർ ആൻഡ്​ ഷാസ്​ തുടങ്ങിയ പാർട്ടികളിലെ അംഗങ്ങളാണ്​ കത്തയച്ചത്​. ഹമാസി​െൻറ ഭരണവും സൈനിക പ്രവർത്തനങ്ങളും തകർക്കുന്നതിൽ ഇസ്രായേൽ സൈന്യം പരാജയപ്പെ​ട്ടെന്നും കത്തിൽ ചൂണ്ടിക്കാട്ടി.

ഉപരോധിക്കപ്പെട്ട വടക്കൻ ഗസ്സയിൽനിന്ന്​ ഫലസ്​തീനികളെ ഇസ്രായേൽ സൈന്യം ‘ശരിയായ’ രീതിയിൽ പുറത്താക്കുന്നില്ല. അവരെ ശത്രുക്കളായി ഇപ്പോഴും കാണുന്നില്ല. ഇസ്രായേൽ സൈന്യം സമ്പൂർണ ഉപരോധം ഏർപ്പെടുത്തണം. അടിസ്​ഥാന ആവശ്യങ്ങൾ നശിപ്പിച്ച്​ ‘പൂർണമായ ശുദ്ധീകരണം’ ഉറപ്പാക്കുകയും വേണം. ഗസ്സയുടെ മറ്റു ഭാഗങ്ങളിലും ഇത്തരം ക്രൂരമായ തന്ത്രങ്ങൾ പ്രയോഗിക്കണമെന്നും ഇവർ ആവശ്യപ്പെട്ടു.

വടക്കൻ ഗസ്സയിൽ നിലവിൽ 70,000ത്തോളം​ പേർ താമസസൗകര്യവും ഭക്ഷണവുമില്ലാതെ വലയുകയാണ്​. ഇവിടേക്കുള്ള മാനുഷിക സഹായവിതരണം ഇസ്രായേൽ നിരന്തരം തടയുന്നുണ്ട്​.  ഇതിനിടയിലാണ്​ നെസെറ്റ്​ അംഗങ്ങളുടെ കത്ത്​ പുറത്തുവരുന്നത്​. ഇവിടത്തെ മിക്ക ആശുപത്രികളും സൈന്യം തകർത്തിട്ടുണ്ട്​. ബെയ്​ത്​ ലഹിയയിലെ ഇന്തോനേഷ്യൻ ആശുപത്രിയിൽനിന്ന്​ എല്ലാവരോടും ഒഴിഞ്ഞുപോകാൻ കഴിഞ്ഞദിവസം സൈന്യം ഉത്തരവിട്ടു​.

വെള്ളിയാഴ്​ചയും വലിയ രീതിയിലുള്ള ആക്രമണമാണ്​ ഇസ്രായേൽ ഗസ്സയിൽ നടത്തിയത്​. 35 പേർ​ കൊല്ലപ്പെട്ടു​. മധ്യ ഗസ്സയിലെ ആക്രമണത്തിൽ മാത്രം 19 പേരാണ്​ കൊല്ലപ്പെട്ടത്​. കഴിഞ്ഞ 24 മണിക്കൂറിനിടെ രണ്ട്​ മാധ്യമപ്രവർത്തകരും ഇസ്രായേലി ആക്രമണത്തിന്​ ഇരയായി. ഇതോടെ 15 മാസമായി തുടരുന്ന ആക്രമണത്തിനിടെ 202 പേർ കൊല്ലപ്പെട്ടന്ന്​ ഗസ്സ സർക്കാർ മീഡിയ ഓഫീസ്​ അറിയിച്ചു.

അതേസമയം, കഴിഞ്ഞദിവസങ്ങളിലായി നിലച്ച വെടിനിർത്തൽ ചർച്ചകൾ പുനരാരംഭിച്ചിട്ടുണ്ട്​. ഖത്തറിൽ നടക്കുന്ന മധ്യസ്​ഥ ചർച്ചകൾക്കായി മൊസാദ്​, ഷിൻബെത്​, സൈന്യം എന്നിവയുടെ ​പ്രതിനിധികളെ നിയോഗിച്ചിട്ടുണ്ടെന്ന്​ പ്രധാനമന്ത്രി ​ബെഞ്ചമിൻ നെതന്യാഹുവി​െൻറ ഓഫീസ്​ അറിയിച്ചു. ഗസ്സയിൽനിന്ന്​ എല്ലാ ഇസ്രായേലി സൈനികരെയും ഉടൻ പിൻവലിക്കണമെന്ന ആവശ്യത്തിൽനിന്ന്​ ഹമാസ്​ പിൻവാങ്ങാൻ സാധ്യതയുണ്ടെന്ന്​ അൽ ജസീറ റിപ്പോർട്ട്​ ചെയ്യുന്നു. ഈ നിബന്ധനയിൽ അയവ്​ വേണമെന്ന്​ ഖത്തർ, ഈജിപ്​ത്​ മധ്യസ്​ഥർ​ കനത്ത സമ്മർദം ചെലുത്തുന്നുണ്ടെന്നാണ്​​ റിപ്പോർട്ട്​.