കോവിഡ് വാക്സിന്‍ വിറ്റ് നേട്ടമുണ്ടാക്കിയത് ഒമ്പതു കോടീശ്വരന്മാര്‍; പീപ്പിൾസ് വാക്സിൻ അലയന്‍സ് റിപ്പോര്‍ട്ട്

കോവിഡ് മഹാമാരി ലോകത്താകമാനം പ്രതിസന്ധികള്‍ സൃഷ്ടിച്ചപ്പോള്‍ ശതകോടീശ്വരന്മാരുടെ പട്ടികയില്‍ പുതുതായി ചേര്‍ക്കപ്പെട്ടത് ഒമ്പതു പേരെന്ന് റിപ്പോര്‍ട്ട്. കോവിഡ് വാക്​സിൻ വിറ്റ്​​ ശതകോടീശ്വ​രൻമാരായവരുടെ വിവരങ്ങൾ പീപ്പിൾസ് വാക്സിൻ അലയന്‍സാണ് പുറത്തുവിട്ടത്. 

ജി 20 ആഗോള ആരോഗ്യ ഉച്ചകോടിക്ക് മുന്നോടിയായാണ് വാക്സിനായി പ്രചാരണം നടത്തുന്ന സംഘടനകളുടെയും പ്രവർത്തകരുടെയും കൂട്ടായ്മയായ​ പീപ്പിൾസ് വാക്സിൻ അലയൻസ് അംഗങ്ങള്‍ കോടീശ്വരൻമാരുടെ കണക്കുകൾ ശേഖരിച്ചത്​. ഇതുപ്രകാരം, കോവിഡില്‍ ഇവരുടെ ആസ്​തി 19.3 ബില്യൺ ഡോളറായാണ് ഉയർന്നത്. ഈ പണമു​പയോഗിച്ച്​ ദരിദ്രരാജ്യങ്ങളിലെ മുഴുവൻ ആൾക്കാരെയും 1.3 തവണ വാക്സിനേറ്റ് ചെയ്യാമെന്നും പീപ്പിൾസ് വാക്സിൻ അലയൻസ്​ വെളിപ്പെടുത്തുന്നു. 

മോഡേണയുടെ സി.ഇ.ഒ സ്​റ്റീഫൻ ബാൻസെൽ, ബയോഎന്‍ടെക് സി.ഇ.ഒയും സഹസ്ഥാപകനുമായ ഉഗുർ‌ സാഹിൻ‌, ഇമ്യൂണോളജിസ്റ്റും മോഡേണയുടെ സ്ഥാപക നിക്ഷേപകനുമായ തിമോത്തി സ്പ്രിംഗർ, മോഡേണയുടെ ചെയർമാൻ നൗബർ അഫിയാൻ എന്നിവരടങ്ങുന്നതാണ് ഒമ്പതു​ ശതകോടീശ്വരൻമാരുടെ പട്ടിക.

കോവിഷീൽഡ്​ വാക്​സിൻ നിർമാതാക്കളായ സിറം ഇൻസ്റ്റിറ്റ്യൂട്ട് ഓഫ് ഇന്ത്യയുടെ സ്ഥാപകനും അദാർ പൂനവാലെയുടെ പിതാവുമായ സൈറസ് പൂനവാലെയുടെ വരുമാനത്തിലും വൻ വർധനയുണ്ടായിട്ടുണ്ട്. കഴിഞ്ഞ വർഷം 8.2 ബില്യൺ ഡോളറായിരുന്നുവെങ്കിൽ 2021 ൽ അദ്ദേഹത്തിന്‍റെ ആസ്തി 12.7 ബില്യൺ ഡോളറായാണ് ഉയർന്നതെന്ന് കണക്കുകൾ സൂചിപ്പിക്കുന്നു. 

ജീവൻ നിലനിർത്താൻ ​വേണ്ടി ജനം എന്തു വില നൽകാനും ശ്രമിക്കുമെന്നുള്ള ഉറപ്പാണ് ഈ കെട്ടകാലത്തും കൊള്ളലാഭം നേടാൻ​ കുത്തകകളെ പ്രേരിപ്പിക്കുന്നത്​. ലോക ജനങ്ങളുടെ പണം കൊണ്ടാണ്​ ഇവർ കോടീശ്വരൻമാരാകുന്നതെന്നും പീപ്പിൾസ് വാക്സിൻ അലയൻസ് കുറ്റപ്പെടുത്തി. 

വാക്​സിൻ എന്നത്​​ പണസമ്പാദനത്തിനുള്ള മാർഗം മാത്രമാകരുത്​. നന്മയായിരിക്കണം അതിനു പിന്നിലെ ഘടകം. സാമ്പത്തികമായി പിന്നാക്കം നിൽക്കുന്ന രാജ്യങ്ങളിലെ പൗരന്മാർക്ക്​ വലിയവില നൽകി വാക്​സിൻ വാങ്ങാനാകാത്ത സാഹചര്യമുണ്ട്​. വാക്​സിൻ ഉത്പാദന രംഗത്തെ കുത്തകവത്​കരണം അവസാനിപ്പിച്ചാലെ അതിനു​ പരിഹാരമുണ്ടാകുവെന്നും പീപ്പിൾസ് വാക്സിൻ അലയൻസ്​ വാദിച്ചു.