ഗസ്സയിൽ ഇടതടവില്ലാതെ ഇസ്രായേൽ ആക്രമണം; മരണസംഖ്യ 1,400 കടന്നു

ഗസ്സ/ദുബൈ: ഫലസ്തീനുനേരെയുള്ള ഇസ്രായേൽ വ്യോമാക്രമണം തുടർച്ചയായ ആറാംദിനവും തുടരുന്നു. ഗസ്സയിൽ മരണസംഖ്യ 1,417 ആയി ഉയർന്നു. ലബനാൻ അതിർത്തിയിലും യുദ്ധസാധ്യത കനത്തു. സിദ്റത്തിനു നേർക്ക്​ ഹമാസ് കൂടുതൽ റോക്കറ്റുകൾ വിക്ഷേപിച്ചു. ഈജിപ്തിന്റെ റഫ അതിർത്തി വഴി ഗസ്സയിലേക്കു മാനുഷിക സഹായം എത്തിക്കാനുള്ള നീക്കം ഊർജിതമായി നടക്കുകയാണ്.

ഗസ്സക്കുമേൽ ആക്രമണം കൂടുതൽ കടുപ്പിച്ചതോടെ ആശുപത്രികളിൽ പുതുതായി ആരെയും പ്രവേശിപ്പിക്കാൻ ഇടമില്ലാതെ വന്നതായി അന്താരാഷ്​ട്ര റെഡ്​ക്രോസ്​ അറിയിച്ചു. കൂടുതൽ താമസ കെട്ടിടങ്ങൾ തകർന്നതോടെ ഗസ്സയിൽ മരണസംഖ്യയും പരിക്കേറ്റവരുടെ എണ്ണവും ഉയരുകയാണ്​. റഫ അതിർത്തിക്കുനേരയുള്ള ആക്രമണത്തിൽനിന്ന്​ ഇസ്രായേൽ വിട്ടുനിന്നാൽ ഇന്നുതന്നെ ജീവകാരുണ്യ ഉൽപന്നങ്ങൾ ഗസ്സയിൽ എത്തിക്കാനാകുമെന്ന്​ ഈജിപ്​ത്​ വിദേശകാര്യ മന്ത്രി പറഞ്ഞു.

കരയാക്രമണം സംബന്ധിച്ച ഇസ്രായേൽ തീരുമാനം വൈകുകയാണ്​. ഗസ്സ അതിർത്തി പ്രദേശങ്ങളിൽനിന്ന്​ പതിനായിരങ്ങളെ മാറ്റി. ലബനാനിൽനിന്ന്​ ഹിസ്​ബുല്ലയുടെ റോക്കറ്റാക്രമണം തുടരുന്നതു മുൻനിർത്തി ആയിരക്കണക്കിന്​ റിസർവ്​ സൈനികരെ അവിടേക്ക്​ നിയോഗിച്ചു. ഹമാസിനെയും ഇസ്​ലാമിക്​ ജിഹാദിനെയും അവസാനിപ്പിക്കുംവരെ യുദ്ധം തുടരുമെന്ന്​ നെതന്യാഹു പറഞ്ഞു. അതേസമയം കടൽമാർഗം ഹമാസ്​ പോരാളികൾ വീണ്ടും ഇസ്രായേലിൽ എത്തുന്നത്​ സൈന്യത്തിന്​ ആശങ്ക സൃഷ്​ടിക്കുന്നുണ്ട്​.

വിവിധ ഇസ്രായേൽ പ്രവിശ്യകൾക്കുനേരെ ഇന്നും ഹമാസ്​ നൂറുകണക്കിന്​ റോക്കറ്റുകളയച്ചു. തെൽഅവീവിലും ഫൈഹയിലും സിദ്​റത്തിലും റോക്കറ്റുകൾ പതിച്ചു. ഹമാസ്​ അയച്ച 5,000 റോക്കറ്റുകളിൽ 2,000 തുറസ്സായ സ്ഥലങ്ങളിലാണ്​ വീണതെന്ന്​ നെതന്യാഹു പറഞ്ഞു.

ബന്ദികളുടെ മോചനം സംബന്ധിച്ച് അറബ്​ രാജ്യങ്ങളുടെ മധ്യസ്​ഥതയിൽ നീക്കം ഊർജിതമാണ്. ഒരു ഇസ്രായേൽ വനിതയെയും രണ്ട്​ കുട്ടികളെയും ഹമാസ്​ മോചിപ്പിച്ചത്​ മധ്യസ്​ഥ ചർച്ചകൾക്ക്​ ആക്കം കൂട്ടിയിട്ടുണ്ട്​. അതിനിടെ, ഗസ്സക്കു പിന്നാലെ ഇസ്രായേലിൽ തടവിലുള്ള ഫലസ്​തീനികൾക്കുള്ള വെള്ളവും വൈദ്യുതിയും നിഷേധിച്ചു. ആയിരക്കണക്കിന്​ തടവുകാരുടെ സുരക്ഷ ഉറപ്പാക്കാൻ യു.എന്നിന്‍റെ പിന്തുണ തേടുകയാണ്​ ഫലസ്​തീൻ.

ഇസ്രായേലിൽ ആക്രമണം നടത്തിയ ആരെയും വെറുതെ വിടില്ലെന്ന്​ സൈന്യം മുന്നറിയിപ്പ്​ നൽകി. 97 സൈനികർ ഹമാസിന്‍റെ പിടിയിലുണ്ടെന്ന്​ ഇസ്രായേൽ സ്​ഥിരീകരിച്ചു. ഇസ്ലാമിക്​ ജിഹാദ്​ നേതാവ്​ അബ്​ദുർറഹ്​മാൻ ശിഹാബും കുടുംബവും ഇസ്രായേൽ ആക്രമണത്തിൽ കൊല്ലപ്പെട്ടിട്ടുണ്ട്.

Summary: Israeli airstrikes on Palestine continue for sixth consecutive day as the death toll in Gaza rose to 1,417