ഗൾഫ്​ സാമ്പത്തിക രംഗം ശക്​തം; പുതിയ സാമ്പത്തിക റിപ്പോർട്ട് പുറത്ത്

യു.എ.ഇ ഉൾപ്പെടെ ഗൾഫ്​ രാജ്യങ്ങളുടെ സാമ്പത്തിക മേഖലയിൽ വൻ മുന്നേറ്റം. നടപ്പുവർഷത്തെ ആദ്യപകുതിയിലെ റിപ്പോർട്ട്​ പ്രകാരം കയറ്റിറക്കുമതി ഉൾപ്പെടെ എല്ലാ രംഗങ്ങളിലും മികച്ച നേട്ടം കൈവരിക്കാൻ ജി.സി.സി രാജ്യങ്ങൾക്കായി. ​നിലവിലെ മുന്നേറ്റം വരും വർഷങ്ങളിലും തുടരാൻ ഗൾഫിനാകുമെന്നും ഫോറക്സ്​ ഡോട്ട്​ കോം പുറത്തുവിട്ട സാമ്പത്തിക വിശകലനറിപ്പോർട്ട്​ വ്യക്തമാക്കുന്നു.

തൊട്ടുമുൻവർഷത്തെ അപേക്ഷിച്ച്​ വിവിധ തുറകളിൽ നിർണായക സാമ്പത്തികമുന്നേറ്റം കൈവരിക്കാൻ ആറ്​ ഗൾഫ്​ രാജ്യങ്ങൾക്കും സാധിച്ചതായി ഏറ്റവും പുതിയ റിപ്പോർട്ട്​ വ്യക്​തമാക്കുന്നു. ഗൾഫ്​ ഓഹരി വപണിയിലും മികച്ച ഉണർവാണ്​ രൂപപ്പെട്ടിരിക്കുന്നത്​. സുപ്രധാന കമ്പനികളിൽ ഭൂരിഭാഗത്തിനും നല്ല സാമ്പത്തിക നേട്ടം ഉറപ്പാക്കാനും സാധിച്ചു. സാമ്പത്തിക രംഗത്തെ വൈവിധ്യവത്​കരണമാണ്​ ഗൾഫ്​ സമ്പദ്​ ഘടനയ്ക്ക്​ ഏറ്റവും കൂടുതൽ തുണയായതെന്നും ഫോറക്​സ്​ ഡോട്ട് ​കോം പുറത്തുവിട്ട വിശകലനം പറയുന്നു. ആഗോള സാമ്പത്തിക രംഗ​ത്തെ തളർച്ച ഗൾഫി​ന്റെ കാര്യത്തിൽ കാര്യമായ പ്രതിഫലനം ഉണ്ടാക്കിയിട്ടില്ല. എന്നാൽ നടപ്പു സാമ്പത്തിക വർഷത്തി​ന്റെ രണ്ടാം പകുതിയിൽ കൂടുതൽ ജാഗ്രത വേണ്ടി വരുമെന്ന ഓർമപ്പെടുത്തലും റിപ്പോർട്ടിലുണ്ട്​.

ഉയർന്ന പലിശനിരക്ക്​, പണപ്പെരുപ്പം എന്നിവ വലിയ വെല്ലുവിളികളായി മാറും​. ആഗോള സമ്പദ്​ ഘടനയുടെ ജിയോപൊളിറ്റിക്കൽ സമ്മർദവും ജി.സി.സി രാജ്യങ്ങൾ ഗൗരവത്തിലെടുക്കണം. പ്രതികൂല ഘടകങ്ങൾക്കിടയിലും എണ്ണയിതര മേഖലയിൽ നല്ല വളർച്ച നേടാൻ എല്ലാ ഗൾഫ്​ രാജ്യങ്ങൾക്കും സാധിക്കുമെന്നു തന്നെയാണ്​​ വിലയിരുത്തൽ. ഹോസ്​പിറ്റാലിറ്റി, റീ​ട്ടെയിൽ, ട്രാവൽ, ടൂറിസം, റിയൽ എസ്​റ്റേറ്റ്​, ധനകാര്യം സാ​ങ്കേതികത, ആരോഗ്യം എന്നീ തുറകളിലാണ്​ കൂടുതൽ വളർച്ച പ്രവചിക്കുന്നത്​. ഈ മേഖലകളിൽ ആയിരക്കണക്കിനു​ പുതിയ തൊഴിലവസരങ്ങൾക്ക്​ സാധ്യതയുണ്ടെന്നും റിപ്പോർട്ട്​ വ്യക്​തമാക്കുന്നു.