ഇസ്രായേൽ നഗരങ്ങളെ ലക്ഷ്യം വെക്കാനുതകുന്ന നവീന ഡ്രോൺ വികസിപ്പിച്ചതായി ഇറാൻ

ഇസ്രായേൽ നഗരങ്ങളെ ലക്ഷ്യം വെക്കാനുതകുന്ന നവീന ഡ്രോൺ വികസിപ്പിച്ചതായി ഇറാൻ. തെൽ അവീവ്​, ഹൈഫ എന്നീ ഇസ്രായേൽ നഗരങ്ങളിൽ നാശം വിതക്കാനുതകുന്ന ഡ്രോണിന്​ 'അറാഷ്​ രണ്ട്​' എന്നാണ്​ നാമകരണം ചെയ്​തിരിക്കുന്നത്​. ആണവ പദ്ധതിയുടെ പേരിൽ ഇറാനെതിരെ സ്വന്തം നിലക്ക്​ ആക്രമണം നടത്താൻ രാജ്യം സജ്ജമാണെന്ന്​ കഴിഞ്ഞ ദിവസം ഇസ്രായേൽ മുന്നറിയിപ്പ്​ നൽകിയിരുന്നു.

തുടർച്ചയായ ഇസ്രായേൽ താക്കീത്​ മുൻനിർത്തിയാണ്​ അറാശ്​ രണ്ട്​ എന്ന ഡ്രോൺ വികസിപ്പിച്ചെടുത്തതെന്ന്​ ഇറാൻ കരസേനാ കമാണ്ടർ കിയോമസ്​ ഹൈദരി അറിയിച്ചു. ഇസ്രായേൽ നഗരങ്ങളിൽ വ്യാപകനാശം വിതക്കാൻ ഡ്രോണിന്​ സാധിക്കുമെന്നാണ്. ​ഇറാൻ സൈന്യത്തി​ന്റെ അവകാശവാദം. പിന്നിട്ട ഒരാഴ്​ചക്കകം വികസിപ്പിച്ചെടുത്ത ഡ്രോൺ ഇസ്രായേൽ നഗരങ്ങളെ ലക്ഷ്യമിട്ട്​ പ്രത്യേകമായ തയാർ ചെയ്​തതാണെന്ന്​ വ്യക്​തമാക്കാനും സൈന്യം മറന്നില്ല. ഭാവി സൈനികാഭ്യാസങ്ങളിൽ പുതിയ ഡ്രോണി​ന്റെ ക്ഷമത പരീക്ഷിക്കുമെന്നും സൈനിക കമാണ്ടർ വ്യക്​തമാക്കി. സാറ്റലൈറ്റ്​ നിയന്ത്രിത മിസൈലുകൾക്കും ഇറാൻ രൂപം നൽകിയതായി സൈന്യം വെളിപ്പെടുത്തി.

സ്വന്തം നിലക്ക്​ ഏതൊരു സൈനിക നീക്കവും നടത്താൻ യു.എസ്​ പ്രസിഡൻറ്​ ജോബൈഡൻ അനുമതി നൽകിയതായി കഴിഞ്ഞ ദിവസം ഇസ്രായേൽ പ്രധാനമന്ത്രി യായിർ ലാപിഡ്​ വ്യക്​തമാക്കിയിരുന്നു. തങ്ങളുടെ ക്ഷമ പരീക്ഷിക്കരുതെന്നും ഇസ്രായേലി​ൻറ സൈനികക്ഷമത അനുഭവിച്ചറിയുമെന്നും പ്രധാനമന്ത്രി ഇറാന്​ താക്കീതും നൽകി. ഈ സാഹചര്യത്തിലാണ്​ സൈനികാഭ്യാസങ്ങളിലൂടെയും ആയുധങ്ങൾ വികസിപ്പിച്ചും ഇറാൻ ഇസ്രായേലിന്​ വ്യക്​തമായ സന്ദേശം നൽകുന്നത്​. ​

സൈനികമായല്ല, മറിച്ച്​ നയതന്ത്ര ചർച്ചകളിലൂടെയാണ്​ പ്രശ്​നം പരിഹരിക്കേണ്ടതെന്ന നിലപാടാണ്​ ഗൾഫ്​ രാജ്യങ്ങൾക്കുള്ളത്​. ഇക്കാര്യം അമേരിക്കൻ നേതൃത്വത്തെ ജി.സി.സി അറിയിച്ചതുമാണ്​. ഇറാ​ൻ ആണവ പദ്ധതിയെ ഒരു നിലക്കും അംഗീകരിക്കില്ലെന്നാണ്​ ഇസ്രായേൽ വ്യക്​തമാക്കുന്നത്​. യുറേനിയം സമ്പുഷ്​ടീകരണ തോത്​ ഗണ്യമായി ഉയർത്തി ആണവായുധ നിർമാണത്തിലേക്ക്​ കടക്കുകയാണ്​ ഇറാൻ നീക്കമെന്നാണ്​ ഇസ്രായേൽ കുറ്റപ്പെടുത്തൽ. ഇറാ​െൻറ സമീപകാല നടപടികൾ സംശയാസ്​പദമാണെന്ന്​ അന്താരാഷ്​ട്ര ആണവോർജ സമിതിയും ബ്രിട്ടൻ, ഫ്രാൻസ്​, ജർമനി എന്നീ രാജ്യങ്ങളും അടുത്തിടെ കുറ്റപ്പെടുത്തിയിരുന്നു.