ഗസ്സയിലും ലബനാനിലും ആക്രമണം ശക്​തമാക്കി ഇസ്രായേൽ; ഇ​സ്രാ​യേ​ലി​നു നേർക്ക്​ കൂ​ടു​ത​ൽ ആ​ക്ര​മ​ണം ന​ട​ത്തു​മെ​ന്ന് ഹി​സ്ബു​ല്ല

ദുബൈ: ഗസ്സയിലും ​ബെയ്റൂത്ത് ഉൾപ്പെടെ ലബനാൻ പ്രദേശങ്ങളിലും ആക്രമണം വ്യാപിപ്പിച്ച്​ ഇസ്രായേൽ. ബെയ്റൂത്തിൽ ന​ട​ത്തി​യ വ്യോ​മാ​ക്ര​മ​ണ​ത്തി​ൽ മു​തി​ർ​ന്ന ഹി​സ്ബു​ല്ല ക​മാ​ൻ​ഡ​ർ സു​ഹൈ​ൽ ഹു​സൈ​നിയെ വ​ധി​ച്ച​താ​യി ഇ​സ്രാ​യേ​ൽ സൈ​ന്യം അവകാശപ്പെട്ടു.

സിറിയൻ തലസ്ഥാനമായ ദമസ്കസിനു നേരെ നടന്ന ആക്രമണത്തിലും നിരവധി പേർ കൊല്ലപ്പെട്ടു. ഇവരിൽ ഇറാനികൾ ആരും തന്നെയില്ലെന്ന്​ സിറിയയിലെ അമേരിക്കൻ അംബാസഡർ വ്യക്​തമാക്കി. വ​ട​ക്ക​ൻ ഇ​സ്രാ​യേ​ലി​​ലെ ഹൈ​ഫ​യി​ലും ഗ​ലീ​ലി​യി​ലും ഹി​സ്ബു​ല്ല​യു​ടെ ക​ന​ത്ത റോ​ക്ക​റ്റാ​ക്ര​മ​ണം നടന്നു. 12 പേ​ർ​ക്ക് പ​രി​ക്കേ​റ്റതായി ഇസ്രായേൽ സ്ഥിരീകരിച്ചു.

ഇ​സ്രാ​യേ​ലി​നു നേർക്ക്​ കൂ​ടു​ത​ൽ ആ​ക്ര​മ​ണം ന​ട​ത്തു​മെ​ന്നും വ​ട​ക്ക​ൻ ഇ​സ്രാ​യേ​ലി​ൽ​നി​ന്ന് കൂ​ടു​ത​ൽ പേ​ർ ഒ​ഴി​ഞ്ഞു​പോ​കാ​ൻ നി​ർ​ബ​ന്ധി​ത​രാ​കു​മെ​ന്നും ഹി​സ്ബു​ല്ല നേ​താ​വ് ന​ഈം ഖാ​സിം പ​റ​ഞ്ഞു. അതിനിടെ, ലബനാന്​ ശക്​തമായ മുന്നറിയിപ്പുമായി നെതന്യാഹു പുതിയ വീഡിയോ സന്ദേശം പുറത്തുവിട്ടു.

ഹിസ്​ബുല്ലയെ കൈവെടിഞ്ഞില്ലെങ്കിൽ ഗസ്സയുടെ അതേ ദുരന്തം തന്നെയാകും ലബനാനെയും കാത്തിരിക്കുന്നതെന്ന്​ നെതന്യാഹു വ്യക്തമാക്കി. ഹസൻ നസ്​റുല്ലയെ മാത്രമല്ല പിൻഗാമി ഹാഷിം സൊഫ്​യുദ്ദീനെയും വധിച്ചതായി വെളിപ്പെടുത്തിയ നെതന്യാഹു, ഹിസ്​ബുല്ലയെ ഇല്ലായ്മ ചെയ്യുമെന്നും വ്യക്​തമാക്കി.

ഇറാനെതിരായ പ്രത്യാക്രമണ സ്വഭാവം സംബദ്ധിച്ച്​ നെതന്യാഹുവിന്‍റെ അധ്യക്ഷതയിൽ ചേർന്ന ഇസ്രായേൽ സുരക്ഷാ സമിതി വിലയിരുത്തി. എന്നാൽ പ്രതിരോധ മന്ത്രി യോവ്​ ഗാലന്‍റിന്‍റെ അമേരിക്കൻ സന്ദർശനം നെതന്യാഹു ഇടപെട്ട്​ തടഞ്ഞു. ഇതോടെ ഇറാനെതിരായ നീക്കം സംബന്​ധിച്ച്​ യുഎസ്​ പ്രതിരോധ സെക്രട്ടറി ലോയ്​ഡ്​ ഓസ്റ്റിനുമായി ഇന്ന്​ അമേരിക്കയിൽ നടക്കേണ്ട ചർച്ച മാറ്റി. താനും യുഎസ്​ പ്രസിഡന്‍റ്​ ബൈഡനുമായാണ്​ ചർച്ച നടത്തേണ്ടതെന്ന്​ നെതന്യാഹു പറഞ്ഞതായി ഇസ്രായേൽ മാധ്യമങ്ങൾ റിപ്പോർട്ട്​ ചെയ്തു.

വടക്കൻ ഗസ്സയി​ലെ കമാൽ അദ്​വാൻ ആശുപത്രിക്ക്​ നേരെ ഇസ്രായേൽ സേന ആക്രമണം നടത്തി. മുഴുവൻ രോഗികളെയും മാറ്റണമെന്ന താക്കീത്​ നൽകി അധികം കഴിയും മുമ്പായിരുന്നു ആക്രമണം. മ​ധ്യ ഗ​സ്സ​യി​ലെ അ​ഭ​യാ​ർ​ഥി ക്യാ​മ്പി​ൽ ഇ​സ്രാ​യേ​ൽ ബോം​ബി​ങ്ങി​ൽ 17 ഫ​ല​സ്തീ​നി​ക​ൾ കൊ​ല്ല​പ്പെ​ട്ടു. 24 മ​ണി​ക്കൂ​റി​നി​ടെ, ഗ​സ്സ​യി​ൽ 56 പേ​രാ​ണ് ഇ​സ്രാ​യേ​ൽ കു​രു​തി​ക്കി​ര​യാ​യ​ത്. മേഖലായുദ്ധം ഒഴിവാക്കാൻ സാധ്യമായ എല്ലാ ശ്രമവും തുടരുന്നതായി അമേരിക്ക സൗദി അറേബ്യ ഉൾപ്പെടെ ഗൾഫ്​ രാജ്യങ്ങൾക്ക്​ ഉറപ്പു നൽകി.