സൈനിക നഷ്ടം ഏൽപ്പിച്ച ആഘാതം മറികടക്കാൻ ആക്രമണം കടുപ്പിച്ച്​ ഇസ്രായേൽ

കനത്ത സൈനിക നഷ്ടം ഏൽപ്പിച്ച ആഘാതം മറികടക്കാൻ സിവിലിയൻ കേന്ദ്രങ്ങളിൽ ആക്രമണം കടുപ്പിച്ച്​ ഇസ്രായേൽ. 24 മണിക്കൂറിനിടെ ഉന്നത ഓഫിസർമാർ ഉൾപ്പെടെ 24 സൈനികരാണ്​ കൊല്ലപ്പെട്ടത്​. ഗസ്സയിൽ ഒറ്റ ദിവസം കൊണ്ട്​ ഇത്രയേറെ സൈനികർ വധിക്കപ്പെട്ടത്​ ഇസ്രായേലിനെ അക്ഷരാർഥത്തിൽ ഞെട്ടിച്ചു.

ടാങ്കുകൾക്ക് നേരെയുണ്ടായ റോക്കറ്റ് ആക്രമണത്തിൽ 10 സൈനികരും കെട്ടിടത്തിലുണ്ടായ സ്ഫോടനത്തിൽ 14 സെനികരുമാണ്​ കൊല്ലപ്പെട്ടത്​. തീർത്തും വേദന നിറഞ്ഞതും നടുക്കുന്നതുമാണ് വാർത്തയെന്ന്​​ ഇസ്രായേൽ പ്രധാനമന്ത്രി നെതന്യാഹു, മന്ത്രിമാരായ യോവ് ഗാലന്റ്​, ബെന്നി ഗാൻറ്​സ്​ എന്നിവർ സംയുക്​ത പ്രസ്​താവനയിൽ പ്രതികരിച്ചു.

ഗസ്സയിലെ നാസികളെ എല്ലാ കരുത്തും ഉപയോഗിച്ച്​ അമർച്ച ചെയ്യുമെന്ന്​ യുദ്ധകാര്യ കാബിനറ്റ് മന്ത്രി ബെൻഗവിർ പ്രതികരിച്ചു. കൂടുതൽ റിസർവ്​ സൈനികരെ ഇറക്കി ദീർഘകാല യുദ്ധത്തിലേക്ക്​ നീങ്ങേണ്ടി വരുമെന്ന്​ സൈന്യം വ്യക്തമാക്കി.

ഗസ്സയിൽ സിവിലിയൻ കേന്ദ്രങ്ങളിൽ ആക്രമണം കടുപ്പിച്ചും നിരപരാധികളുടെ കുരുതി തുടർന്നുമാണ്​ ഇസ്രായേലിന്റെ പ്രത്യാക്രമണം. ഗസ്സയിലെ നാസർ മെഡിക്കൽ കോംപ്ലക്​സും അൽ അമൽ ഹോസ്​പിറ്റലും വളഞ്ഞ സൈന്യം നിരന്തരം ആക്രമണം തുടരുന്നതായി ദൃക്​സാക്ഷികൾ അറയിച്ചു. നിലവിൽ പരിക്കേറ്റവരെ കൊണ്ട് ​ നിറഞ്ഞിരിക്കുന്ന ആശുപത്രികളിലേക്ക്​ പുതതായി ആരെയും എത്തിക്കാൻ പോലും സാധിക്കുന്നില്ലെന്ന്​ ആരോഗ്യ പ്രവർത്തകർ പറഞ്ഞു.

പിന്നിട്ട 24 മണിക്കൂറിനിടെ 195 പേരാണ്​ കൊല്ലപ്പെട്ടത്​. 354 പേർക്ക്​ പരിക്കേറ്റു. ഗസ്സയിൽ ആകെ മരണം 25,490 ആയി. പരിക്കേറ്റവരുടെ എണ്ണം 63,354 ആയി ഉയർന്നു.

അതേസമയം ഇസ്രായേലിൽ ബന്ദികളുടെ കുടുംബാംഗങ്ങളുടെ പ്രതിഷേധം ശക്​തമായി തുടരുകയാണ്. ബന്ദികളുടെ രക്തം നിങ്ങളുടെ കൈകളിലാണെന്ന് കുറിച്ച ബാനറുകളുമായായിരുന്നു പ്രതിഷേധം. ബന്ദി മോചനത്തിനായി രണ്ടുമാസത്തെ വെടിനിർത്തൽ നിർദേശം ഇസ്രായേൽ മുന്നോട്ടുവെച്ചതായി റിപ്പോർട്ടുണ്ട്​. എന്നാൽ, ഹമാസ്​ ഉപാധികൾക്ക്​ വഴങ്ങി വെടിനിർത്തലിനില്ലെന്ന്​ നെതന്യാഹു പ്രതികരിച്ചു.

സംയുക്തസേനയുടെ ആക്രമണത്തിലൂടെ യെമനിലെ എട്ട് ഹൂതി കേന്ദ്രങ്ങൾ തകർത്തതായി അമേരിക്ക അറിയിച്ചു. കപ്പലിനു നേരെ ഹൂതി ആക്രമണം നടന്നതായും റിപ്പോർട്ടുണ്ട്​. തെക്കൻ ലെബനനിലെ ഹിസ്ബുള്ള പോസ്റ്റുകൾക്കു നേരെ ഇസ്രായേൽ ആക്രമണം വ്യാപിപ്പിച്ചു.

ഇസ്രായേൽ ആക്രമണം രൂക്ഷമായ തെക്കൻ ഗസ്സയിൽ റെഡ്ക്രസൻിന്റെ കെട്ടിടത്തിന് നേരെയും ബോംബാക്രമണമുണ്ടായി. ഇതിനിടെ യു.എൻ സെക്യൂരിറ്റി കൗൺസിൽ രാജ്യങ്ങളിലെ മന്ത്രിമാരുടെ യോഗം ഇന്ന് ചേരും.