നെതന്യാഹുവിനെതിരായ മോശം പരാമർശമുള്ള പോസ്​റ്റ്​ വീണ്ടും പങ്കുവെച്ച്​ ട്രംപ്​

വാഷിങ്ടൺ: ഇസ്രായേൽ പ്രധാനമന്ത്രി ബെഞ്ചമിൻ നെതന്യാഹുവിനെതിരായ മോശം പരാമർശം അടങ്ങിയ വിഡിയോ വീണ്ടും പങ്കുവെച്ച്​ നിയുക്ത യുഎസ് പ്രസിഡന്റ് ഡൊണാൾഡ് ട്രംപ്. സോഷ്യൽ മീഡിയ പ്ലാറ്റ്ഫോമായ ട്രൂത്ത് സോഷ്യലിലൂടെയാണ് പോസ്​റ്റ്​ പങ്കുവെച്ചത്​. നെതന്യാഹുവിനെ 'ആഴമുള്ള ഇരുണ്ട മകൻ' എന്നാണ്​ വിഡിയോയിൽ വിശേഷിപ്പിക്കുന്നത്.

നെതന്യാഹു യുഎസ് വിദേശനയത്തിൽ കൃത്രിമം കാണിക്കുന്നുണ്ടെന്നും മിഡിൽ ഈസ്റ്റിൽ അനന്തമായ യുദ്ധങ്ങൾ നടത്തുകയാണെന്നും സാമ്പത്തിക വിദഗ്ധൻ ജെഫ്രി ഡി സാച്ച്സ് ആരോപിക്കുന്ന വീഡിയോയാണ്​ ട്രംപ് ട്രൂത്ത് സോഷ്യലിൽ പങ്കിട്ടത്​. ബന്ദി ചർച്ചകളെക്കുറിച്ചും സിറിയൻ നയത്തെക്കുറിച്ചും ഇരുവരും വളരെ സൗഹൃദപരമായി ചർച്ച നടത്തിയെന്ന് നെതന്യാഹു അവകാശപ്പെട്ടതിന് പിന്നാലെയാണ് ട്രംപിന്റെ പോസ്​റ്റ്​ വരുന്നത്​.

1995 മുതൽ ഹമാസിനെയും ഹിസ്ബുള്ളയെയും ആക്രമിച്ച്, അവരെ പിന്തുണയ്ക്കുന്ന ഇറാഖ്, ഇറാൻ, സിറിയ എന്നീ രാജ്യങ്ങളെ ഇല്ലാതാക്കാനാണ് നെതന്യാഹു ശ്രമിക്കുന്നതെന്ന് സാച്ച്സ് വിഡിയോയിൽ ആരോപിക്കുന്നുണ്ട്​. ഇതിലാണ്​ നെതന്യാഹുവിനെതിരെ മോശം പരാമർശമുള്ളത്​. എന്നാൽ, നെതന്യാഹുവിനെതിരായ വിഡിയോ ഇപ്പോൾ പങ്കിടാനുള്ള ട്രംപിന്റെ ഉദ്ദേശ്യം വ്യക്തമല്ല.

അധികാരത്തിലേറും മുമ്പ് മുഴുവൻ ഇസ്രായേൽ ബന്ദികളേയും വിട്ടയക്കണമെന്ന് കഴിഞ്ഞ ദിവസം ട്രംപ് ആവശ്യപ്പെട്ടിരുന്നു. വീണ്ടും ചുമതലയേല്‍ക്കുമ്പോഴും അവര്‍ തിരിച്ചെത്തിയില്ലെങ്കില്‍ പശ്ചിമേഷ്യയിലെ സ്ഥിതിഗതികള്‍ സംഘര്‍ഷാവസ്ഥയിലേക്ക് നീങ്ങുമെന്നായിരുന്നു ഹമാസിന് ട്രംപ് മുന്നറിയ്പ്പ് നൽകിയത്.