മയക്കുമരുന്ന്​ നൽകി യു.പിയിൽ യുവതിയെ കൂട്ടബലാത്സംഗം ചെയ്​തു​

ഉത്തർപ്രദേശിൽ മയക്കുമരുന്ന്​ കലർത്തിയ പാനീയം നൽകി ബോധരഹിതയാക്കിയ ശേഷം യുവതിയെ കൂട്ടബലാത്സംഗം ചെയ്​തു. മീററ്റ്​ ജില്ലയിലെ റോഹ്​ത പ്രദേശത്തുള്ള ഹോട്ടലിലാണ്​ സംഭവം. രണ്ടു പ്രതികളെ പൊലീസ്​ അറസ്റ്റ്​ ചെയ്​തു. ജിംനേഷ്യം ഉടമയാണ് പ്രതികളിൽ ഒരാൾ. മൂന്നാം പ്രതി ഒളിവിലാണ്​.

അമർപാൽ എന്നയാളുടെ ഉടമസ്​ഥതയിലുള്ളതായിരുന്നു റസ്​ന റോഡിലെ ഹോട്ടൽ​. ഇതിന്‍റെ ഒന്നാം നിലയിലായിരുന്നു അമർപാലിന്‍റെ മകൻ ഉജ്വലിന്‍റെ ജിംനേഷ്യം. വെള്ളിയാഴ്ച വൈകീട്ടാണ്​ ഉജ്വലും രണ്ട്​ സുഹൃത്തുക്കളും യുവതിയെ കൂട്ടി ഹോട്ടലിലെത്തിയത്​. അവിടെ വെച്ച്​ മയക്കുമരുന്ന്​ നൽകി ബോധരഹിതയാക്കിയ ശേഷം പ്രതികൾ കൂട്ടബലാത്സംഗം ചെയ്യുകയായിരുന്നു.

ബോധം തിരികെ ലഭിച്ച ശേഷം യുവതി ബന്ധുവിനെ വിളിച്ച്​ സംഭവം അറിയിക്കുകയായിരുന്നു. പൊലീസിനെ വിവരമറിയിച്ച ബന്ധു ഉടൻ സ്​ഥലത്തെത്തി. രണ്ടുപ്രതികളെ സംഭവ സ്ഥലത്ത്​ വെച്ച്​ തന്നെ പിടികൂടി. ഉജ്വലും സത്​വായ്​ സ്വദേശിയായ സൗരഭുമാണ്​ അറസ്റ്റിലായത്​. മൂന്നാം പ്രതിയായ മോനുവാണ്​ രക്ഷപെട്ടത്​. പീഡനത്തിനിരയായ പെൺകുട്ടിയെ വൈദ്യപരിശോധനക്ക്​ വിധേയമാക്കിയ ശേഷം പൊലീസ്​ മൊഴി രേഖപ്പെടുത്തി.