'സുഡാനി'യുടെ ഫേസ്ബുക്കും ഫുള്‍; ഇനി ഫ്രണ്ട് റിക്വസ്റ്റ് അയക്കേണ്ട
സുഡാനിയായി അഭിനയിച്ച സാമുവല്‍ റോബിന്‍സണ് സ്വീകരിക്കാവുന്ന ഫ്രണ്ട്സ് റിക്വസ്റ്റുകളുടെ പരിധി കഴിഞ്ഞു
നവാഗതനായ സക്കരിയ സംവിധാനം ചെയ്ത സുഡാനി ഫ്രം നൈജീരിയ എന്ന ചിത്രം മികച്ച റിപ്പോര്‍ട്ട് നേടി മുന്നേറുകയാണ്. ഇന്നലെ റിലീസ് ചെയ്ത ചിത്രം കണ്ടവരെല്ലാം നല്ല അഭിപ്രായമാണ് പങ്കുവെക്കുന്നത്. പ്രധാന കഥാപാത്രത്തെ അവതരിപ്പിച്ച സൌബിന്‍ ഷാഹിറിന് പുറമെ സുഡാനിയായി അഭിനയിച്ച സാമുവല്‍ റോബിന്‍സണും വന്‍ കയ്യടിയാണ് ലഭിക്കുന്നത്.
സിനിമ കണ്ടവരും സോഷ്യല്‍ മീഡിയയിലൂടെ സിനിമയെപ്പറ്റി അറിഞ്ഞവരും ഇപ്പോള്‍ 'സുഡാനിക്ക്' ഫേസ്ബുക്കില്‍ ഫ്രണ്ട് റിക്വസ്റ്റ് അയക്കുകയാണെന്ന് തോന്നുന്നു, കാരണം മറ്റൊന്നുമല്ല, ഫ്രണ്ട് റിക്വസ്റ്റ് സ്വീകരിക്കാനാവില്ലെന്ന് പറയുന്നത് 'സുഡാനി' തന്നെയാണ്. കാരണം മറ്റൊന്നുമല്ല, സ്വീകരിക്കാവുന്ന ഫ്രണ്ട്സ് റിക്വസ്റ്റുകളുടെ പരിധി കഴിഞ്ഞു, ഫേസ്ബുക്ക് അക്കൌണ്ട് നിറഞ്ഞുവെന്നും പകരം തുടങ്ങിയ എഫ്ബി പേജ് ലൈക്ക് ചെയ്യാമെന്നും സാമുവല്‍ പറയുന്നു. എഫ്ബി പേജിന്‍റെ ലിങ്കും താരം പോസ്റ്റ് ചെയ്തിട്ടുണ്ട്. ചിത്രം ഇറങ്ങുന്നതിന് മുമ്പ് കുറഞ്ഞ ലൈക്കുകളും ഷെയറുകളും മാത്രം ലഭിച്ചിരുന്ന സാമുവലിന്‍റെ പോസ്റ്റുകള്‍ക്ക് ഇപ്പോള്‍ മികച്ച പ്രതികരണമാണ് ലഭിക്കുന്നത്. സൌബിനുമൊത്തുള്ള ചിത്രത്തിലെ ഒരു രംഗം പോസ്റ്റ് ചെയ്തതിന് ഇതിനകം ആയിരത്തിന് മുകളില്‍ ലൈക്കുകളായി.