ഇസ്രായേൽ അതിക്രമത്തെ ബഹ്റൈൻ ശൂറ കൗൺസിൽ അപലപിച്ചു

ഇസ്രായേൽ സൈനികർ അൽ അഖ്​സ മസ്​ജിദിൽ അതിക്രമിച്ചു കയറി ആരാധന നടത്തിക്കൊണ്ടിരുന്ന നിരപരാധർക്ക്​ നേരെ അക്രമം നടത്തിയ നടപടിയെ ബഹ്റൈൻ ശൂറ കൗൺസിൽ അപലപിച്ചു.

ഫലസ്​തീനികളുടെ അവകാശം കവർന്നെടുക്കുകയും അവർക്ക്​ ​നേ​രെ പലവിധ ​അക്രമങ്ങൾ തുടരുകയും ചെയ്യുന്നത്​ നീതീകരിക്കാനാവില്ല. മേഖലയുടെ സുരക്ഷയെയും സമാധാനത്തെയും ഇത്​ സാരമായി ബാധിക്കുകയും ചെയ്യും.

ഇസ്രായേലിന്‍റെ ഭാഗത്തു നിന്നും ഉണ്ടായിക്കൊണ്ടിരിക്കുന്ന മാനവിക വിരുദ്ധ നടപടി അന്താരാഷ്​ട്ര മാനദണ്ഡങ്ങളുടെ നിരാകരണവും നിയമ ലംഘനവുമാണ്​. വിശുദ്ധ സ്​ഥലങ്ങൾക്ക്​ നേരെയുള്ള കൈയേറ്റം എല്ലാ തരം മതശാസന​കളെയും അന്താരാഷ്​ട്ര മര്യാദകളെയും വെല്ലുവിളിക്കുന്നതാ​ണ്​.

അൽ അഖ്​സയുടെയും അവിടെ പ്രാർഥനക്കെത്തുന്നവരുടെയും സുരക്ഷ ഉറപ്പാക്കാനും അതിക്രമങ്ങൾ ആവർത്തിക്കുന്നത്​ ഒഴിവാക്കാനും കഴിയണമെന്നും പ്രസ്​താവനയിൽ വ്യക്​തമാക്കി.