ഖത്തർ ലോകകപ്പിന് ആവേശം പകർന്ന് 'മോഹൻലാൽ സല്യൂട്ട് ടു ഖത്തർ' പുറത്തിറങ്ങി

ഖത്തർ ലോകകപ്പിന് ഐക്യദാർഢ്യവുമായി മോഹൻലാലും. ഇതിന്റെ ഭാഗമായി 'മോഹൻലാൽ സല്യൂട്ട് ടു ഖത്തർ' എന്ന വീഡിയോ ഗാനം ഖത്തറിൽ പുറത്തിറക്കി.

മലപ്പുറത്തെ ഫുട്‌ബോൾ ആവേശം പറയുന്ന ഗാനം പാടിയിരിക്കുന്നതും മോഹൻലാൽ ആണ്. മലപ്പുറത്തെ ഫുട്‌ബോൾ ആവേശവും സെവൻസ് ഫുട്‌ബോളിന്റെ വേരുകളുമാണ് വരികളിലും കാഴ്ചകളിലും നിറഞ്ഞിരിക്കുന്നത്. ഹിഷാം അബ്ദുൽ വഹാബ് ആണ് ഗാനം ചിട്ടപ്പെടുത്തിയിരിക്കുന്നത്. മലപ്പുറത്തിന്റെ ഫുട്‌ബോൾ ഖ്യാതി വാനോളം ഉയർത്തിയ പ്രൊഫഷണൽ താരങ്ങളും മോഹൻലാലിനൊപ്പം വീഡിയോയിൽ അഭിനയിച്ചിട്ടുണ്ട്.

ടി.കെ രാജീവ് കുമാറാണ് സംവിധാനം നിർവഹിച്ചിരിക്കുന്നത്. ഖത്തറുമായി വർഷങ്ങളായുള്ള ആത്മബന്ധമാണ് ഇത്തരമൊരു ഗാനവുമായി വരാൻ പ്രചോദനമായതെന്ന് ദോഹയിൽ നടന്ന പരിപാടിയിൽ മോഹൻലാൽ പറഞ്ഞു.