നെയ്മറും മെസിയും എംബാപ്പെയുമടക്കം പി.എസ്.ജി ടീം ഖത്തറില്‍ സന്ദര്‍ശനത്തിനെത്തുന്നു
ലോകകപ്പ് പ്രചാരണ പരിപാടികളിലാണ് സൂപ്പര്‍ താരങ്ങള്‍ പങ്കെടുക്കുക
Update: 2022-05-05 04:48 GMT
സൂപ്പര്‍ താരങ്ങളടങ്ങിയ ഫ്രഞ്ച് ചാമ്പ്യന്മാരായ പി.എസ്.ജി ടീം ഖത്തറില്‍ സന്ദര്‍ശനത്തിനെത്തുന്നു. ഈ മാസം 15 നും 16നുമാണ് നെയ്മറും മെസിയും എംബാപ്പെയും അടക്കമുള്ള സംഘം ഖത്തറിലുണ്ടാവുക.
ഈ വര്‍ഷം ജനുവരിയില്‍ പി.എസ്.ജി ടീം ഖത്തര്‍ സന്ദര്‍ശിക്കേണ്ടതായിരുന്നു. എന്നാല്‍ ഒമിക്രോണ്‍ വ്യാപനത്തെ തുടര്‍ന്ന് അന്ന് മാറ്റിവെക്കേണ്ടി വന്ന സന്ദര്‍ശനമാണ് ഇപ്പോള്‍ നടക്കാനിരിക്കുന്നത്. ഫ്രഞ്ച് ലീഗില്‍ കിരീടം നേടിയ ശേഷമാണ് ടീം ഖത്തറിലെ ആരാധകരെ കാണാനെത്തുന്നത്.
എന്നാല്‍ ഖത്തറില്‍ പി.എസ്.ജിക്ക് മത്സരങ്ങളൊന്നുമില്ല. പകരം ലോകകപ്പ് പ്രചാരണ പരിപാടികളിലാണ് സൂപ്പര്‍ താരങ്ങള്‍ പങ്കെടുക്കുക. രണ്ട് ലോകകപ്പ് വേദികളിലും സന്ദര്‍ശനം നടത്തും. ഇതിന് പുറമെ ക്യു.എന്‍.ബി, ഖത്തര്‍ ടൂറിസം, ഖത്തര്‍ എയര്‍ വേസ്, ആസ്‌പെറ്റാര്‍, തുടങ്ങിയ ടീം സ്‌പോണ്‍സര്‍മാരുടെ പരിപാടികളിലും സൂപ്പര്‍താരനിര പങ്കെടുക്കും.