രൂപയുടെ ഇടിവ്​ തുടരുന്നു; നാട്ടിലേക്ക്​ പണം അയക്കുന്നതിൽ വർധന

ഇന്ത്യൻ രൂപയുടെ തളർച്ച പ്രയോജന​പ്പെടുത്തി പ്രവാസികൾ. രൂപ ചരിത്രത്തിലെ ഏറ്റവും വലിയ വിനിമയ തകർച്ചയാണ്​ നേരിടുന്നത്​. യു.എ.ഇ ഉൾപ്പെടെ ഗൾഫ്​ രാജ്യങ്ങളിൽ നിന്ന്​ നാട്ടിലേക്ക്​ അയക്കുന്ന പണത്തിൽ 25 ശതമാനം വർധന ഉണ്ടായതായി വിവിധ പണിമിടപാട്​ സ്​ഥാപനങ്ങൾ വെളിപ്പെടുത്തി.

നടപ്പുവർഷം ജനുവരിക്കു ശേഷം രൂപയുടെ മൂല്യത്തിൽ 11 ശതമാനം ഇടിവാണ്​ രേഖപ്പെടുത്തിയത്​. അസംസ്​കൃത എണ്ണവില വർധനയാണ്​ പ്രധാനമായും രൂപയുടെ മൂല്യതകർച്ചക്ക്​ വഴിവെച്ചത്​. ഒരു ഡോളറിന്​ 83 രൂപക്കു മുകളിലേക്ക്​ വിനിമയ മൂല്യം ഇടിഞ്ഞതോടെ പ്രവാസികൾക്ക്​ നേട്ടമായി. കഴിഞ്ഞ ആഴ്​ചകളിൽ ഇന്ത്യയിലേക്ക്​ പ്രവാസികൾ വൻതുക കൈമാറിയെന്നാണ്​ സ്ഥാപനങ്ങൾ വ്യക്​തമാക്കുന്നത്​.

ഒരു യു.എ.ഇ ദിർഹത്തിന്​ 22 രൂപ 47 പൈസ എന്നതാണ്​ പുതിയ നിരക്ക്​. മറ്റു ഗൾഫ്​ കറൻസികൾക്കും ഉയർന്ന വിനിമയ മൂല്യമാണ്​ പ്രവാസികൾക്ക്​ ലഭിക്കുന്നത്​. അസംസ്​കൃത എണ്ണവില ഉയരുന്ന പ്രവണതയാണ്​ നിലവിലുള്ളത്​. ഇതിനു പുറമെ വ്യാപാര കമ്മിയും ഇന്ത്യൻ രൂപക്ക്​ തിരിച്ചടിയാണ്​. രൂപയുടെ മൂല്യം ഇടിയുന്ന സാഹചര്യം തുടരാൻ തന്നെയാണ്​ സാധ്യത. വായ്​പാ തിരിച്ചടവ്​ ഉൾപ്പെടെയുള്ളവ നടപ്പാക്കാൻ അനുകൂല സാഹചര്യമാണിതെന്ന്​ സാമ്പത്തിക വിദഗ്​ധർ പ്രവാസികളെ ഓർമിപ്പിക്കുന്നു.