യുഎഇയിലേക്കുള്ള വിമാന നിരക്കിൽ വർധന; പ്രവാസികളുടെ മടക്കയാത്ര പ്രതിസന്ധിയിൽ

ദുബൈ: യുഎഇയിൽ അടുത്ത ആഴ്ച സ്കൂളുകൾ തുറക്കാനിരിക്കെ നാട്ടിൽ നിന്നുള്ള വിമാന നിരക്കുകളിൽ വൻ വർധന. മിക്ക വിമാന കമ്പനികളിലും വൻതുക നൽകിയാണ്​ പ്രവാസി കുടുംബങ്ങളുടെ മടക്കയാത്ര. നേരിട്ടുള്ള വിമാനങ്ങളിൽ സീറ്റ്​ ലഭിക്കാത്തതു കാരണം കണക്ഷൻ ഫ്ലൈറ്റുകളെ ആശ്രയിക്കുന്നവരും കുറവല്ല.

രണ്ടു മാസത്തോളം നീണ്ട വേനലവധിക്ക്​ അറുതിയായി ഈ മാസം 28നാണ്​ യുഎഇയിൽ ഇന്ത്യൻ വിദ്യാലയങ്ങൾ തുറക്കുന്നത്​. അധ്യാപകരും ജീവനക്കാരും ഇതിനകം തന്നെ യുഎഇയിൽ മടങ്ങിയെത്തിയിട്ടുണ്ട്​. സമീപകാലത്തെ ഏറ്റവും ഉയർന്ന യാത്രാനിരക്ക്​ നൽകാൻ നാട്ടിലെത്തിയ പ്രവാസികൾ നിർബന്ധിക്കപ്പെടുകയാണ്​. നേരത്തെ റി​ട്ടേൺ ടിക്കറ്റെടുത്ത പ്രവാസി കുടുംബങ്ങ​ളെ നിരക്കുവർധന കാര്യമായി ബാധിച്ചിട്ടില്ല.

അതേസമയം, ടിക്കറ്റ്​ ചാർജ്​ കുറയുമെന്ന പ്രതീക്ഷയിൽ മടക്കയാത്രാ ടിക്ക​റ്റെടുക്കാൻ കാത്തിരുന്ന കുടുംബങ്ങളാണ്​ ശരിക്കും വെട്ടിലായത്​. കൊച്ചിയിൽ നിന്ന്​ ദുബൈയിലേക്ക്​ വൺവേ ടിക്കറ്റിന്​ നാൽപതിനായിരത്തിനു മുകളിൽ വരെ തുക നൽകേണ്ട സ്ഥിതിയാണ്​ നിലവിലുള്ളത്​. കുടുംബസമേതം കണക്​ഷൻ ​ഫ്ലൈറ്റുകളിൽ ടിക്കറ്റെടുത്ത് ​യുഎഇയിൽ എത്തേണ്ട സ്ഥിതിയിലാണ്​ പലരും. ഓണം നാട്ടിൽ ചെലവിട്ട്​ മടങ്ങാൻ തീരുമാനിച്ച കുടുംബങ്ങൾക്കും നിരക്കുവർധന വലിയ തിരിച്ചടിയായി. 

അധിക സർവീസുകൾ ഏർപ്പെടുത്തി പ്രതിസന്ധി മറികടക്കാൻ അവസരം ഒരുക്കമെന്ന പ്രവാസി കൂട്ടായ്​മകളുടെ ആവശ്യമാക​ട്ടെ വിജയിച്ചില്ല. ചാർട്ടർ വിമാനങ്ങൾ ഒരുക്കി യാത്രാപ്രശ്നം മറികടക്കാൻ എല്ലാ നീക്കവും നടത്തുമെന്ന സംസ്ഥാന സർക്കാർ പ്രഖ്യാപനവും ഇനിയും എങ്ങുമെത്തിയില്ല.