നീണ്ട നഖങ്ങളും മേക്കപ്പും വേണ്ട, ഭംഗിയായി മുടി കെട്ടണ്ട; അത്ര സ്റ്റൈലായി ആശുപത്രിയില്‍ വരണ്ടെന്ന് ആരോഗ്യ പ്രവര്‍ത്തകരോട് ഹരിയാന

ചണ്ഡീഗഢ്: ഹരിയാന ആരോഗ്യ പ്രവര്‍ത്തകര്‍ക്ക് ഡ്രസ് കോഡുമായി സര്‍ക്കാര്‍. അധികം ആഭരണങ്ങള്‍ ധരിക്കണ്ടെന്നും ഭംഗിയുള്ള ഹെയര്‍സ്റ്റൈലുകള്‍ വേണ്ടെന്നുമാണ് സര്‍ക്കാര്‍ നിര്‍ദേശം നല്‍കിയിരിക്കുന്നത്. മേക്കപ്പിനും നഖം നീട്ടി വളര്‍ത്തുന്നതിനും സര്‍ക്കാര്‍ 'നോ' പറഞ്ഞിട്ടുണ്ട്.

സർക്കാർ ആരോഗ്യ കേന്ദ്രങ്ങളിലെ ജീവനക്കാർക്കിടയിൽ അച്ചടക്കവും ഏകത്വവും സമത്വവും നിലനിർത്തുക എന്നതാണ് ഡ്രസ് കോഡ് നയത്തിന്‍റെ ലക്ഷ്യമെന്ന് ഹരിയാന ആരോഗ്യ മന്ത്രി അനിൽ വിജ് പറഞ്ഞു. "ഒരു ആശുപത്രിയില്‍ നന്നായി പിന്തുടരുന്ന ഡ്രസ് കോഡ് നയം ഒരു ജീവനക്കാരന് പ്രൊഫഷണൽ ഇമേജ് നൽകുക മാത്രമല്ല പൊതുജനങ്ങൾക്കിടയിൽ ആ സ്ഥാപനത്തിന്‍റെ പ്രതിച്ഛായ വര്‍ധിപ്പിക്കുകയും ചെയ്യും'' അനില്‍ വെള്ളിയാഴ്ച പറഞ്ഞു. ക്ലിനിക്കൽ (മെഡിക്‌സ്, പാരാമെഡിക്കുകൾ), ശുചിത്വം, ശുചിത്വം, സുരക്ഷ, ഗതാഗതം, സാങ്കേതികം, അടുക്കള, ഫീൽഡ് മുതലായവയിൽ പ്രവർത്തിക്കുന്ന എല്ലാ ആശുപത്രി ജീവനക്കാരും ജോലി സമയത്ത് ശരിയായ യൂണിഫോമിൽ ആയിരിക്കണമെന്ന് അദ്ദേഹം പറഞ്ഞു.

നഴ്‌സിംഗ് കേഡർ ഒഴികെയുള്ള ട്രയിനികള്‍ വെള്ള ഷർട്ടും കറുത്ത പാന്‍റ്സും നെയിം ടാഗും ധരിക്കണമെന്നും അദ്ദേഹം കൂട്ടിച്ചേര്‍ത്തു. പുരുഷന്മാരുടെ മുടി കോളറിന്‍റെ നീളത്തിൽ കൂടുതലാകരുത്.അസാധാരണമായ ഹെയർസ്റ്റൈലുകളും പാരമ്പര്യേതര ഹെയർകട്ടുകളും അനുവദനീയമല്ല.നഖങ്ങൾ വൃത്തിയുള്ളതും ട്രിം ചെയ്തതും ഭംഗിയുള്ളതുമായിരിക്കണം.ഏതെങ്കിലും നിറത്തിലുള്ള ജീൻസ്, ഡെനിം സ്കർട്ട്, ഡെനിം വസ്ത്രങ്ങൾ എന്നിവ പ്രൊഫഷണൽ വസ്ത്രങ്ങളായി കണക്കാക്കില്ലെന്നും അതിനാൽ അവ അനുവദിക്കില്ലെന്നും അനിൽ വിജ് പറഞ്ഞു.

പല നിറത്തിലുള്ള ഷര്‍ട്ടുകള്‍,സ്യൂട്ടുകള്‍, സ്ലാക്ക്സ്, പാവാട, പലാസോ എന്നിവയും അനുവദിക്കില്ല. ടീ-ഷർട്ടുകൾ, സ്ട്രെച്ച് ടി-ഷർട്ടുകൾ, സ്‌ട്രെച്ച് പാന്റ്‌സ്, ഫിറ്റിംഗ് പാന്റ്‌സ്, ലെതർ പാന്റ്‌സ്, ക്യാപ്രിസ്, സ്വീറ്റ് പാന്റ്‌സ്, ടാങ്ക് ടോപ്പുകൾ, സീ-ത്രൂ ഡ്രസ്സുകൾ അല്ലെങ്കിൽ ടോപ്പുകൾ, ക്രോപ്പ് ടോപ്പുകൾ, ഓഫ് ഷോൾഡർ ഡ്രസ്സുകൾ, സ്‌നീക്കറുകൾ, സ്ലിപ്പറുകൾ തുടങ്ങിയവയും ജീവനക്കാര്‍ ആശുപത്രിയില്‍ ധരിക്കാന്‍ പാടില്ല. അതുപോലെ പാദരക്ഷകള്‍ വൃത്തിയുള്ളതായിരിക്കണം. വാരാന്ത്യങ്ങൾ, സായാഹ്നങ്ങൾ, രാത്രി ഷിഫ്റ്റുകൾ എന്നിവയുൾപ്പെടെ മുഴുവൻ സമയവും ഡ്രസ് കോഡ് നിർബന്ധമായും പാലിക്കണമെന്ന് അദ്ദേഹം കൂട്ടിച്ചേര്‍ത്തു. ഡ്രസ് കോഡ് പാലിക്കാത്തത് അച്ചടക്ക നടപടിയിലേക്ക് നയിക്കുമെന്നും ആ ജീവനക്കാരനെ അന്നത്തെ ദിവസം ജോലി ചെയ്യാന്‍ അനുവദിക്കില്ലെന്നും മന്ത്രി വ്യക്തമാക്കി.