'അവരുടെ എല്ലാ അസംബന്ധങ്ങൾക്കും ഞാൻ മറുപടി പറയണോ?'; കങ്കണക്കെതിരെ പ്രിയങ്കാ ഗാന്ധി

ന്യൂഡൽഹി: തനിക്കും സഹോദരൻ രാഹുൽ ഗാന്ധിക്കുമെതിരെ നടിയും ബി.ജെ.പി സ്ഥാനാർഥിയുമായ കങ്കണ റണാവത്ത് ഉന്നയിച്ച വിമർശനങ്ങളോട് രൂക്ഷമായി പ്രതികരിച്ച് പ്രിയങ്കാ ഗാന്ധി. ഹിമാചൽപ്രദേശിലെ മാണ്ഡിയിൽനിന്നാണ് കങ്കണ മത്സരിക്കുന്നത്. 'ഇന്ത്യാ ടുഡെ'ക്ക് നൽകിയ അഭിമുഖത്തിലാണ് കങ്കണ രാഹുലിനും പ്രിയങ്കക്കുമെതിരെ പരാമർശം നടത്തിയത്.

രാഹുൽ ഗാന്ധിയും പ്രിയങ്കാ ഗാന്ധിയും രാഷ്ട്രീയത്തിന് യോജിച്ചവരല്ലെന്നായിരുന്നു കങ്കണയുടെ പരാമർശം. ഇരുവരും അവരുടെ അമ്മയുടെ ആഗ്രഹങ്ങളുടെ ഇരയാണെന്നും അമ്മയുടെ നിർബന്ധം മൂലം അവർ രാഷ്ട്രീയത്തിൽ നിൽക്കാൻ നിർബന്ധിതരായതാണെന്നും കങ്കണ പറഞ്ഞിരുന്നു.

തങ്ങളെക്കുറിച്ച് കങ്കണ സംസാരിച്ചതിന് നന്ദിയുണ്ടെന്നും എന്നാൽ അവർ പറയുന്ന എല്ലാ അസംബന്ധങ്ങൾക്കും താൻ മറുപടി പറയേണ്ടതുണ്ടോ എന്നുമായിരുന്നു പ്രിയങ്കയുടെ ചോദ്യം. തന്റെ പിതാവ് ജീവിച്ചിരിക്കുമ്പോൾ പോലും ബി.ജെ.പി സോണിയാ ഗാന്ധിയെ വിമർശിച്ചിരുന്നുവെന്നും പ്രിയങ്ക പറഞ്ഞു.

കോൺഗ്രസ് സനാതന ധർമത്തിന് എതിരാണെന്ന മോദിയുടെ ആരോപണം പ്രിയങ്ക തള്ളി. ഞങ്ങൾ അധികാരത്തെയല്ല, ശക്തിയെയാണ് ആരാധിക്കുന്നത്. രാമന്റെ വഴി സത്യമാണ്. ബി.ജെ.പി ആ വഴിയിലല്ല സഞ്ചരിക്കുന്നതെന്നും പ്രിയങ്ക പറഞ്ഞു.