യു.പിയിൽ വിമത കോൺഗ്രസ് എം.എൽ.എ ബി.ജെ.പിയിൽ

ഉത്തർ പ്രദേശിൽ വിമത കോൺഗ്രസ് എം.എൽ.എ ബി.ജെ.പിയിൽ ചേർന്നു. റായ്‌ബറേലിയിൽ നിന്നുള്ള നിയമസഭാംഗം അദിതി സിംഗാണ് ബുധനാഴ്ച ബി.ജെ.പിയിൽ ചേർന്നത്. ഉത്തർ പ്രദേശിൽ അടുത്ത വർഷം നിയമസഭാ തെരഞ്ഞെടുപ്പ് നടക്കാനിരിക്കെയാണ് അദിതി കോൺഗ്രസ് വിട്ട് ബി.ജെ.പിയിൽ ചേർന്നത്.

ഈ മാസമാദ്യം, കാർഷിക നിയമങ്ങളെ എതിർത്ത കോൺഗ്രസ് അഖിലേന്ത്യാ ജനറൽ സെക്രട്ടറി പ്രിയങ്ക ഗാന്ധിയെ വിമർശിച്ച് അവർ രംഗത്തെത്തിയിരുന്നു.

" പുതിയ ബില്ലുകൾ അവതരിപ്പിക്കുമ്പോൾ അവർക്ക് പ്രശ്നമാണ്. നിയമങ്ങൾ പിൻവലിക്കുമ്പോൾ അവർക്ക് പ്രശ്നമാണ്. അവർക്ക് എന്താണ് വേണ്ടത്?. അവരത് വ്യക്തമായി പറയണം. അവർ വിഷയത്തെ രാഷ്ട്രീയവത്കരിക്കുകയാണ്. രാഷ്ട്രീയവത്കരിക്കാൻ വിഷയങ്ങളില്ലാതെ നട്ടംതിരിയുകയാണ് അവർ." - അവർ പറഞ്ഞതായി എ.എൻ.ഐ റിപ്പോർട്ട് ചെയ്തു.

ഈ വർഷം മെയ്യിൽ അദിതി സിംഗിനെ കോൺഗ്രസിന്റെ വനിതാ സംഘടനയിൽ നിന്നും പുറത്താക്കിയിരുന്നു.

Summary : Rebel Congress MLA Aditi Singh Joins BJP Ahead of UP Assembly Polls