ശിവഗിരി ധർമസംഘം തെരഞ്ഞെടുപ്പ്: സ്വാമി പ്രകാശാനന്ദക്ക് തോല്‍വി
സ്വാമി സച്ചിദാനന്ദ, ചെമ്പഴന്തി ഗുരുകുല കാര്യദര്‍ശി ആയിരുന്ന സ്വാമി ശുഭാംഗാനന്ദ എന്നിവര്‍ തോറ്റ പ്രമുഖരില്‍ ഉള്‍പ്പെടുന്നു
വര്‍ക്കല ശിവഗിരി മഠം ട്രസ്റ്റിലേക്ക് നടന്ന തെരഞ്ഞെടുപ്പില്‍ നിലവിലെ പ്രസിഡന്‍റ് പ്രകാശാനന്ദ തോറ്റു. ട്രസ്റ്റ് ബോര്‍ഡ് ഡയറക്ടര്‍ ബോര്‍ഡിലേക്ക് 11 പേര്‍ തെരഞ്ഞെടുക്കപ്പെട്ടതില്‍ 10 വര്‍ഷമായി പ്രസിഡന്‍റായിരുന്നു പ്രകാശാനന്ദ ഉള്‍പ്പെട്ടില്ല. നിലവിലെ ഭരണ സമിതിയിലെ 5 പേരും തോറ്റിട്ടുണ്ട്. സ്വാമി സച്ചിദാനന്ദ, ചെമ്പഴന്തി ഗുരുകുല കാര്യദര്‍ശി ആയിരുന്ന സ്വാമി ശുഭാംഗാനന്ദ എന്നിവര്‍ തോറ്റ പ്രമുഖരില്‍ ഉള്‍പ്പെടുന്നു.
രാവിലെ 11 ന് തുടങ്ങിയ വോട്ടെടുപ്പില്‍ 55 സ്വാമിമാരാണ് വോട്ട് ചെയ്തത്. ബോര്‍ഡ് പ്രസിഡന്‍റിന്‍റെ തെരഞ്ഞെടുപ്പ് അടുത്ത ആഴ്ച നടക്കും. 55 സന്യാസിമാര്‍ക്കു വോട്ടവകാശമുണ്ടായിരുന്ന തെരഞ്ഞെടുപ്പ് ഫലം പുറത്തുവന്നപ്പോള്‍ 19 വോട്ടുകള്‍ മാത്രമാണ് പ്രകാശാനനന്ദയ്ക്കു നേടാന്‍ കഴിഞ്ഞത്. തെരഞ്ഞെടുപ്പില്‍ പരാജയപ്പെട്ട സാഹചര്യത്തില്‍ പ്രകാശാനന്ദയ്ക്ക് ഇനി മഠാധിപതിയായി തുടരാനാകില്ല.