തെരുവുനായ്ക്കളെ കൊല്ലുന്നവര്‍ക്ക് സ്വര്‍ണ നാണയം സമ്മാനം !
ഏറ്റവും കൂടുതല്‍ തെരുവ് നായ്ക്കളെ കൊല്ലുന്നവര്‍ക്ക് സ്വര്‍ണ നാണയം സമ്മാനം വാഗ്ദാനം ചെയ്ത് പാല സെന്റ് തോമസ് കോളജിലെ അലുമിനി അസോസിയേഷന്‍
ഏറ്റവും കൂടുതല്‍ തെരുവ് നായ്ക്കളെ കൊല്ലുന്നവര്‍ക്ക് സ്വര്‍ണ നാണയം സമ്മാനമായി വാഗ്ദാനം ചെയ്ത് പാല സെന്റ് തോമസ് കോളജിലെ അലുമിനി അസോസിയേഷന്‍. ഡിസംബര്‍ പത്തിനകം ഏറ്റവും കൂടുതല്‍ തെരുവ് നായ്ക്കളെ കൊല്ലുന്ന പ്രാദേശിക ഭരണകര്‍ത്താക്കളെയാണ് സ്വര്‍ണ നാണയം കാത്തിരിക്കുന്നത്.
കഴിഞ്ഞ നാലു മാസത്തിനിടെ കേരളത്തില്‍ നാലു പേരുടെ ജീവന്‍ അപഹരിക്കുകയും 700 പേരെ കടിച്ചുകീറുകയും ചെയ്ത തെരുവുനായ്ക്കളെ ഉന്മൂലനം ചെയ്യാനോ നിയന്ത്രിക്കാനോ അധികാരികള്‍ മുന്‍കൈ എടുക്കാത്ത സാഹചര്യത്തിലാണ് അലുമിനി അസോസിയേഷന്‍ രംഗത്തുവന്നിരിക്കുന്നത്. അടുത്തിടെ വീടിന്റെ വരാന്തയില്‍ കിടന്നുറങ്ങുകയായിരുന്ന 90 കാരനെ തെരുവുനായകള്‍ കടിച്ചുകൊന്നിരുന്നു. ഇതേത്തുടര്‍ന്ന് ജനരോഷമിരമ്പിയ പ്രദേശത്ത് നാട്ടുകാര്‍ നിരവധി തെരുവുനായ്ക്കളെ കൊന്നിരുന്നു. എന്നാല്‍ തെരുവുനായ്ക്കളെ കൊന്ന നാട്ടുകാരെ അറസ്റ്റ് ചെയ്യാനും കേസെടുക്കാനുമാണ് പൊലീസ് എത്തിയത്. ഈ സാഹചര്യത്തിലാണ് തെരുവ് നായ്ക്കളെ കൊല്ലാന്‍ നേതൃത്വം നല്‍കുന്ന പഞ്ചായത്ത് പ്രസിഡന്റുമാര്‍ക്കും മുനിസിപ്പല്‍ ചെയര്‍മാന്‍മാര്‍ക്കും സ്വര്‍ണ നാണയം സമ്മാനമായി നല്‍കാന്‍ അസോസിയേഷന്‍ തീരുമാനിച്ചത്. അക്രമകാരികളായ നായ്ക്കളില്‍ നിന്ന് ജനങ്ങള്‍ക്ക് സംരക്ഷണം നല്‍കുന്നതിനാണ് ഈ തീരുമാനം എടുത്തതെന്നും അസോസിയേഷന്‍ ജനറല്‍ സെക്രട്ടറി ജെയിംസ് പാമ്പയ്ക്കല്‍ പറഞ്ഞു. തെരുവ് നായ ശല്യം പരിഹരിക്കുന്നതിന് സര്‍ക്കാര്‍ ഒന്നും ചെയ്യുന്നില്ല. സര്‍ക്കാര്‍ നിഷ്‌ക്രിയമാണെന്നും ജെയിംസ് ആരോപിച്ചു. അസോസിയേഷനില്‍ അംഗങ്ങളായ 1200 പേരില്‍ നിന്ന് സംഭാവന സ്വീകരിച്ചു കൊണ്ടാകും സ്വര്‍ണനാണയങ്ങള്‍ വാങ്ങുന്നത്. നേരത്തെ തെരുവുനായ്ക്കളെ കൊല്ലുന്നവര്‍ക്ക് ക്യാഷ് അവാര്‍ഡ് നല്‍കുമെന്ന് പ്രമുഖ വ്യവസായി പ്രഖ്യാപിച്ചിരുന്നു.