പൊതുവിദ്യാഭ്യാസ സംരക്ഷണത്തിന് വിദ്യാഭ്യാസഗ്രാമസഭ; മാതൃകയായി പെരുവയല്‍ പഞ്ചായത്ത്
Update: 2018-05-23 17:31 GMT
എസ് സി ഇ ആര്‍ ടി അക്കാദമിക പഠനത്തിനായി സംസ്ഥാനതലത്തില്‍ തെരഞ്ഞെടുത്ത എട്ട് സ്കൂളുകളിലൊന്നായ ചെറുകുളത്തൂര്‍ ജി എല്‍ പി സ്കൂളിലായിരുന്നു ഗ്രാമസഭ
പൊതുവിദ്യാഭ്യാസ സംരക്ഷണ പരിപാടിയില്‍ പൊതുജനങ്ങളുടെ പങ്കാളിത്തം ഉറപ്പുവരുത്താന്‍ സംസ്ഥാനത്തെ ആദ്യ വിദ്യാഭ്യാസ ഗ്രാമസഭയുമായി കോഴിക്കോട് പെരുവയല്‍ പഞ്ചായത്ത്. എസ് സി ഇ ആര്‍ ടി അക്കാദമിക പഠനത്തിനായി സംസ്ഥാനതലത്തില്‍ തെരഞ്ഞെടുത്ത എട്ട് സ്കൂളുകളിലൊന്നായ ചെറുകുളത്തൂര്‍ ജി എല്‍ പി സ്കൂളിലായിരുന്നു ഗ്രാമസഭ. സ്കൂളിലെ പഠന മികവ് വര്‍ദ്ധിപ്പിക്കുന്നതിനൊപ്പം ജനകീയ ഇടപ്പെടലിന്റെ സാധ്യത കൂടി തേടുകയായിരുന്നു ഗ്രാമസഭയുടെ ലക്ഷ്യം.
പതിവ് ഗ്രാമസഭ പോലെ തന്നെ . നാട്ടിലെ ജനങ്ങള്‍ ഒരിടത്ത് ഒത്തു കൂടി. ഇന്നത്തെ പൊതു വിദ്യാഭ്യാസത്തിന്‍റെ പ്രശ്നങ്ങള്‍ വിലയിരുത്തി. നല്ല മാറ്റങ്ങളെ കുറിച്ച് ചിന്തിച്ചു. സ്വപ്നങ്ങള്‍ പങ്കുവെച്ചു.പൊതുവിദ്യാലയങ്ങളുടെ ആവശ്യകത ഉറപ്പുവരുത്തുകയും വിദ്യാലയത്തിന്‍റെ നിലനില്‍പ്പിനായി ജനങ്ങളുടെ പങ്കാളിത്തം ഉറപ്പുവരുത്തുകയുമാണ് വിദ്യാഭ്യാസ ഗ്രാമസഭയിലൂടെ ലക്ഷ്യമിടുന്നത്.
ഈ പങ്കുവെക്കലും വിലയിരുത്തലുകളുമെല്ലാം കോര്‍ത്തെടുക്കാന്‍ എസ് സി ഇ ആര്‍ ടി അധികൃതരും സ്കൂളിലേക്കെത്തി. പാഠ്യപദ്ധതിയിലുള്‍പ്പെട്ട കാര്യങ്ങളില്‍ ഗ്രാമസഭയുടെ പ്രാധാന്യം എങ്ങനെ ഉപയോഗപ്പെടുത്താന്‍ സാധിക്കുമെന്ന് പരിശോധിക്കുകയാണ് എസ് സി ഇ ആര്‍ ടിയുടെ ലക്ഷ്യം. ഗ്രാമസഭയിലൂടെ ഉയര്‍ന്ന് വന്ന ആശയങ്ങള്‍ ക്രോഡീകരിച്ച് അക്കാദമിക മാസ്റ്റര്‍ പ്ലാന്‍ സര്‍ക്കാരിന് സമര്‍പ്പിക്കും.