വോട്ടു തേടി ദിലീപും പത്തനാപുരത്ത്; മോഹന്‍ലാലിന് പിന്തുണ
Update: 2018-05-28 02:32 GMT
പത്തനാപുരത്ത് നിന്നും ജനവിധി തേടുന്ന കെ.ബി.ഗണേഷ് കുമാറിന് വോട്ടുതേടി ദിലീപും
മോഹന്‍ലാലിനു പിന്നാലെ പത്തനാപുരത്ത് ഗണേഷ് കുമാറിന് വോട്ട് അഭ്യര്‍ഥിക്കാന്‍ നടന്‍ ദിലീപും. താരങ്ങള്‍ പ്രചാരണത്തിന് പോവുന്നത് താരസംഘടനയായ അമ്മ വിലക്കിയിട്ടില്ലെന്ന് ദിലീപ് പത്താനാപുരത്ത് പറഞ്ഞു. കൊല്ലത്തെ എല്‍.ഡി.എഫ് സ്ഥാനാര്‍ഥി മുകേഷിനായും ദിലീപ് വോട്ട് അഭ്യര്‍ഥിച്ചു. ഏത് പ്രശ്നവും പരിഹരിക്കാന്‍ ശേഷിയുള്ള മുകേഷിനെ വിജയിപ്പിക്കണെമെന്നായിരുന്നു കൊല്ലത് ദിലീപിന്റെ അഭ്യര്‍ഥന.
പത്തനാപുരത്തെ എല്‍.ഡി.എഫ് സ്ഥാനാര്‍ഥി ഗണേഷിന്റെ പ്രചാരണത്തിന് മോഹന്‍ലാല്‍ എത്തിയത് താരസംഘടനയായ അമ്മയില്‍ പൊട്ടിത്തെറികള്‍ക്ക് വഴിവെച്ചിരുന്നു. വിവാദങ്ങള്‍ കെട്ടടങ്ങും മുമ്പാണ് നടന്‍ ദിലീപും ഗണേഷിന് വോട്ട് അഭ്യര്‍ഥിക്കാന്‍ എത്തിയത്. താരങ്ങള്‍ പ്രചാരണത്തിന് പോകുന്നത് താരസംഘടനയായ അമ്മ വിലക്കിയിട്ടില്ലെന്ന് പത്തനാപുരത്തെ പ്രചാരണത്തിനിടെ ദിലീപ് പറഞ്ഞു. സ്ഥാനാര്‍ഥികളായ സിനിമാ താരങ്ങളാരും മത്സരിക്കാന്‍ അമ്മയുടെ അനുവാദം വാങ്ങിയില്ലെന്നും ദിലീപ് പറഞ്ഞു.
സംവിധായകന്‍ നാദിര്‍ഷയും പ്രചാരണങ്ങളില്‍ പങ്കെടുത്തു. അതേ സമയം മോഹന്‍ലാലിനു പിന്നാലെ ദിലീപ് കൂടി എല്‍.ഡി.എഫ് പ്രാചാരണ വേദിയില്‍ എത്തിയത് യു.ഡി.എഫ് ക്യാമ്പില്‍ കടുത്ത അസംതൃപ്തിക്ക് വഴി വെച്ചിട്ടുണ്ട്.