പാമ്പാടിയിൽ പ്രതിയുടെ ആക്രമണത്തിൽ പൊലീസുകാരന് പരിക്ക്
പാമ്പാടി പോലീസ് സ്റ്റേഷനിലെ ജിബിൻ ലോബോക്കാണ് പരിക്കേറ്റത്
Update: 2023-05-15 04:18 GMT
കോട്ടയം: കോട്ടയം പാമ്പാടിയിൽ പ്രതിയുടെ ആക്രമണത്തിൽ പൊലീസുകാരന് പരിക്ക്. പാമ്പാടി പോലീസ് സ്റ്റേഷനിലെ ജിബിൻ ലോബോക്കാണ് പരിക്കേറ്റത്. പാമ്പാടി നെടുങ്കുഴി സ്വദേശി സാമാണ് ആക്രമിച്ചത്. സാമിന്റെ ഭാര്യയുടെ പരാതി അന്വേഷിക്കാൻ എത്തിയപ്പോഴായിരുന്നു ആക്രമണം.
ഇന്നലെ രാത്രി 10.30 ഓടെയാണ് സാമിന്റെ വീട്ടിലേക്ക് പൊലീസ് സംഘമെത്തിയത്. സാം മര്‍ദിക്കുന്നു എന്ന ഭാര്യയുടെ പരാതി അന്വേഷിക്കാനാണ് പൊലീസ് സംഘം എത്തിയത്. പൊലീസ് എത്തുമ്പോള്‍ സാമിന്റെ ഭാര്യ മുറിയില്‍ പൂട്ടിയിട്ട നിലയിലായിരുന്നു.
പൊലീസ് കതക് തുറക്കാൻ ശ്രമിക്കുന്നതിനിടെയാണ് പൊലീസിന് നേരെ പ്രതിയുടെ ആക്രമണമുണ്ടായത്. ജിബിന്‍റെ തലക്കാണ് പരിക്കേറ്റത്. ജിബിന്‍ കോട്ടയം മെഡിക്കൽ കോളേജിൽ ചികിത്സയിലാണിപ്പോള്‍. ആക്രമണത്തിന് ശേഷം പ്രതി ഓടി രക്ഷപ്പെട്ടു. പ്രതിക്കായുള്ള തിരച്ചില്‍ പൊലീസ് തുടരുകയാണ്..