വടക്കുന്നാഥന് 100 പവന്റെ പൊന്നാനയും ഒരുകോടി രൂപയും കാണിക്കയർപ്പിച്ച് ഭക്തൻ

തൃശൂർ: വടക്കുന്നാഥക്ഷേത്രത്തിലേക്ക് 100 പവൻ തൂക്കമുള്ള സ്വർണ ആനയും ഒരു കോടി രൂപയും കാണിക്കയായി സമർപ്പിച്ച് പ്രവാസി ഭക്തൻ. സ്വർണ ആനയ്ക്ക് 45 ലക്ഷത്തോളം രൂപ വിലവരും. ആനയെ നടയിരുത്തുന്ന ചടങ്ങ് പ്രതീകാത്മകമായി നടത്തി. കൊച്ചിൻ ദേവസ്വം ബോർഡിന്റെ ആന പഴയന്നൂർ ശ്രീരാമനെയാണ് പ്രതീകാത്മകമായി നടയിരുത്തിയത്.

നടയിരുത്തലിന്റെ ചടങ്ങുകളിലെല്ലാം സ്വർണ ആനയെയും ഉൾപ്പെടുത്തിയിരുന്നു. വെള്ളയും കരിമ്പടവും വിരിച്ച് ശ്രീരാമനെ ഇരുത്തിയതിനു സമീപം സ്വർണ ആനയെയും വെക്കുകയാണ് ചെയ്തത്.

രണ്ട് ആനകൾക്കും പൂജയുണ്ടായിരുന്നു. ക്ഷേത്രത്തിലെ വലിയബലിക്കല്ലിന് സമീപം പ്രത്യേകം സജ്ജമാക്കിയ സ്ഥലത്താണ് നടയിരുത്തൽ ചടങ്ങ് നടന്നത്. തന്ത്രി പുലിയന്നൂർ ശങ്കരനാരായണൻ നമ്പൂതിരി നേതൃത്വം നൽകി.