വിവാഹ വാഗ്ദാനം നൽകി പീഡനം; പരാതി നൽകിയ യുവതിക്ക് ജീവന് ഭീഷണിയെന്ന് ആരോപണം

തിരുവനന്തപുരം: വിവാഹ വാഗ്ദാനം നൽകി പീഡിപ്പിച്ചെന്ന പരാതി നൽകിയ യുവതിക്ക് ജീവന് ഭീഷണിയുള്ളതായി ആരോപണം. പ്രതിയുടെ ബന്ധുക്കളും സുഹൃത്തുക്കളും നിരന്തരം വാഹനത്തിൽ തന്നെ പിന്തുടരുന്നതായി യുവതി മീഡിയവണ്ണിനോട്‌ പറഞ്ഞു. ഒരു മാസം മുൻപ് രജിസ്റ്റർ ചെയ്ത പീഡനക്കേസിലെ പ്രതിയായ സെലിബ്രിറ്റി ഫിസിക്കൽ ട്രെയിനർ അമൽ മനോഹറിനെ കസ്റ്റഡിയിലെടുക്കാൻ കഴിഞ്ഞിട്ടില്ല.

പ്രൈം വോളിബോൾ ലീഗിലെ അഹമ്മദാബാദ്, ചെന്നൈ ടീമുകളുടെ സ്‌ട്രെങ്ത് ആൻഡ് കണ്ടീഷനിങ് പരിശീലകനായ അമലിനെതിരെ കഴിഞ്ഞ മാസം മ്യൂസിയം പൊലീസ് സ്റ്റേഷനിലാണ് കൊല്ലം സ്വദേശിനി പരാതി നൽകിയത്. കഴിഞ്ഞ ദിവസങ്ങളിൽ കാറിലും ബൈക്കിലുമായി പ്രതിയുടെ സഹോദരനും സുഹൃത്തുക്കളും പിന്തുടർന്നുവെന്നാണ് യുവതിയുടെ ആരോപണം. ഇവർക്കെതിരെ യുവതി തിരുവനന്തപുരം പേട്ട പൊലീസ് സ്റ്റേഷനിൽ പരാതി നൽകി.

ജീവന് ഭീഷണിയുള്ളതായി യുവതി സംസ്ഥാന പൊലീസ് മേധാവിക്കടക്കം പരാതി നൽകിയെങ്കിലും തുടർനടപടികൾ ഉണ്ടായിട്ടില്ല. പ്രതിയെ പിടികൂടാൻ കാലതാമസം വന്നതോടെ ഇയാൾ ജില്ലാ കോടതിയിൽ മുൻ‌കൂർ ജാമ്യാപേക്ഷ നൽകി. പ്രതിക്ക് ഉന്നത ബന്ധങ്ങളുള്ളതിനാൽ ആക്രമിക്കപ്പെടുമോയെന്നും കേസ് അട്ടിമറിക്കപ്പെടുമോയെന്നും ആശങ്കയുള്ളതായി യുവതി പറയുന്നു.