സി.ഐ.ടി.യു നേതാവിന്റെ ഭീഷണി: ജൂനിയർ ഹെൽത്ത് ഇൻസ്‌പെക്ടർക്ക് സംരക്ഷണം ആവശ്യപ്പെട്ട് നഗരസഭയുടെ പരാതി

പത്തനംതിട്ട: പത്തനംതിട്ട നഗരസഭയിലെ ജൂനിയർ ഹെൽത്ത് ഇൻസ്‌പെക്ടർക്ക് സംരക്ഷണം നൽകണമെന്ന് ആവശ്യപ്പെട്ട് പൊലീസിന് നഗരസഭാ സെക്രട്ടറിയുടെ കത്ത്. അനധികൃത മത്സ്യ കച്ചവടക്കാർക്കെതിരെ നടപടി സ്വീകരിച്ച ഹെൽത്ത് ഇൻസ്‌പെക്ടർ ദീപുമോന് ഭീഷണിയുണ്ടെന്ന് കത്തിൽ പറയുന്നു.

ദീപു മോനെ ഭീഷണിപ്പെടുത്തിയെന്ന പരാതിയിൽ സിഐടിയു നേതാവ് സക്കീർ അലങ്കാരത്തിനെതിരെ കഴിഞ്ഞ ദിവസം പൊലീസ് കേസെടുത്തിരുന്നു. ഇതിന് പിന്നാലെ ജീവനക്കാരന് നേരെ ചിലരുടെ ഭാഗത്ത് നിന്ന് ഭീഷണിയുണ്ടായതായും നഗരസഭാ സെക്രട്ടറിയുടെ പരാതിയിലുണ്ട്. അതേസമയം, കോടതി ഉത്തരവ് പ്രകാരമേ സംരക്ഷണം നൽകാനാകൂ എന്നാണ് പൊലീസ് നിലപാട്.