ലഹരിക്കെതിരെ ചെറിയ പെരുന്നാൾ ദിനത്തിൽ ബഹുജന പ്രതിജ്ഞ
ജനകീയ പ്രചാരണത്തിൻ്റെ സംസ്ഥാന തല ഉദ്‌ഘാടനം കഴിഞ്ഞ 22ന് താമരശ്ശേരിയിൽ വെച്ചാണ് നടന്നത്
കോഴിക്കോട്: ലഹരിയെ തുരത്താം, ജീവിതം തിരുത്താം എന്ന പ്രമേയവുമായി എസ് കെ എസ് എസ് എഫ് സംസ്ഥാന വ്യാപകമായി സംഘടിപ്പിക്കുന്ന ജനകീയ പ്രചാരണത്തിന്‍റെ ഭാഗമായി ചെറിയ പെരുന്നാൾ നിസ്കാര ശേഷം ലഹരിക്കെതിരെ ബഹുജന പ്രതിജ്ഞ നടക്കും. ശാഖ കമ്മിറ്റികളുടെ നേതൃത്വത്തിൽ നടക്കുന്ന ബഹുജന പ്രതിജ്ഞക്ക് മഹല്ല് ഭാരവാഹികൾ,ഖത്വീബ്, മദ്റസ, സുന്നി യുവജന സംഘം ഭാരവാഹികൾ, സ്വദർ മുഅല്ലിം നേതൃത്വം നൽകും. മഹല്ലിലെ മുഴുവൻ ജനങ്ങളും ഒരുമിച്ച് കൂടി ആഘോഷ ദിനത്തിൽ ലഹരിയെന്ന മഹാ വിപത്തിനെതിരെയുള്ള പോരാട്ടത്തിൽ പങ്കാളികളാവുകയും അതത് പ്രദേശങ്ങളിൽ ബോധവത്ക്കരണവുമാണ് ഇതിലൂടെ സാധ്യമാകുന്നത്.
റമദാനിന് ശേഷം സമൂഹത്തിൻ്റെ വിവിധ തലങ്ങളിലുള്ളവർക്കിടയിൽ വ്യാപകമായി പ്രചാരണം എത്തുന്ന തരത്തിൽ വിവിധ പരിപാടികളാണ് ആസൂത്രണം ചെയ്തിട്ടുളളത്. ജനകീയ പ്രചാരണത്തിൻ്റെ സംസ്ഥാന തല ഉദ്‌ഘാടനം കഴിഞ്ഞ 22ന് താമരശ്ശേരിയിൽ വെച്ചാണ് നടന്നത്. ലഹരിക്കെതിരെ ജനകീയ ജാഗ്രത സമിതികൾ ഇല്ലാത്ത പ്രദേശങ്ങളിൽ സംഘടന മുൻകയ്യെടുത്ത് ജനപ്രതിനിധികളേയും പൗരപ്രമുഖരേയും മറ്റും ഉൾപ്പെടുത്തി സമിതികൾ രൂപീകരിക്കും.കുടുംബകം (കുടുംബ സംഗമം), ലഹരിക്ക് അടിമയായവർക്ക് പ്രത്യേക കൗൺസിലിംഗ് ക്യാമ്പുകൾ, സഹവാസ ക്യാമ്പ് തുടങ്ങിയവ സംഘടിപ്പിക്കും.
കൗമാരക്കാരായ വിദ്യാർഥികളുടെ പ്രത്യേക കേഡറ്റ് കാമ്പയിൻ കാലയളവിൽ രൂപികരിക്കും. ഇബാദ് ഖാഫില, പോസ്റ്റർ റീൽസ് നിർമ്മാണ മത്സരങ്ങൾ, ജില്ലാതല പാനൽ ടോക്, ലഘുലേഖ വിതരണം, ഡോക്യുമെന്‍ററി പ്രദർശനം, ജനജാഗ്രത സദസ്സ് തുടങ്ങിയവ നടക്കും. ലഹരി മുക്ത സമൂഹത്തിൻ്റെ സാക്ഷാത്കാരത്തിനായി സംഘടന ആവിഷ്കരിച്ച പദ്ധതികളും നിർദ്ദേശങ്ങളും മുഖ്യമന്ത്രിക്കും പ്രതിപക്ഷ നേതാവിനും സമർപ്പിക്കും. ബഹുജന പ്രതിജ്ഞ വിജയിപ്പിക്കുന്നതിന് പ്രവർത്തകർ കർമ്മ രംഗത്തിറങ്ങണമെന്ന് സംസ്ഥാന പ്രസിഡന്‍റ് പാണക്കാട് സയ്യിദ് ഹമീദലി ശിഹാബ് തങ്ങളും ജനറൽ സെക്രട്ടറി ഒ.പി അഷ്റഫ് കുറ്റിക്കടവും അഭ്യർഥിച്ചു.