'മലപ്പുറം വിരുദ്ധ പരാമർശം മുഖ്യമന്ത്രിയുടെ അറിവില്ലാതെയെന്ന് കരുതുന്നില്ല': പി.കെ കുഞ്ഞാലിക്കുട്ടി

മലപ്പുറം: മുഖ്യമന്ത്രിയുടെ അറിവോ സമ്മതമോ ഇല്ലാതെ 'ദ ഹിന്ദു'വിൽ മലപ്പുറം വിരുദ്ധ പരാമർശം പ്രസിദ്ധീകരിക്കുമെന്ന് കരുതുന്നില്ലെന്ന് മുസ്‌ലിം ലീഗ് ദേശീയ ജനറൽ സെക്രട്ടറി പി.കെ കുഞ്ഞാലിക്കുട്ടി എം പി. മുഖ്യമന്ത്രി ഉന്നയിച്ച വിഷയം നിസാരമായ ഒന്നല്ല. ഇത് അബദ്ധത്തിൽ സംഭവിക്കുന്നതല്ല. ആരോ കൃത്യമായി പ്ലാൻ ചെയ്തതിന്റെ ഭാഗമായി ഉണ്ടായിട്ടുള്ളതാണ്. ഗുരുതരമായ ഈ ആരോപണത്തിലെ മുഖ്യമന്ത്രിയുടെ വിശദീകരണം തൃപ്തികരമല്ലെന്നും കുഞ്ഞാലിക്കുട്ടി പറഞ്ഞു.

മലപ്പുറം കേന്ദ്രീകരിച്ച് ചില പൊലീസുകാർ നടത്തിയിരുന്ന കുത്സിത പ്രവർത്തനങ്ങളെക്കുറിച്ച് നിസാരവത്കരിച്ചാണ് മുഖ്യമന്ത്രിയുടെ മറുപടി. കേരളത്തെ തീവ്രവാദ പ്രവർത്തനങ്ങളുടെ ആസ്ഥാനമായി ചിത്രീകരിക്കാൻ ബിജെപി കാലങ്ങളായി ശ്രമിക്കുകയാണ്. അതിന് വെള്ളവും വളവും ഒഴിച്ചുകൊടുക്കാൻ കഴിയുന്ന ഒന്നാണ് മുഖ്യമന്ത്രിയുടെ പ്രസ്താവനയെന്നും ഈ പ്രസ്താവനയെ അവര്‍ ഉപയോഗപ്പെടുത്തുമെന്നും കുഞ്ഞാലിക്കുട്ടി പറഞ്ഞു.