ഉരുൾപൊട്ടലും മലവെള്ളപ്പാച്ചിലും; പാലക്കാട് ജില്ലയിൽ വ്യാപക നാശം

ഉരുൾ പൊട്ടലിലും മലവെള്ളപ്പാച്ചിലിലും പാലക്കാട് ജില്ലയിൽ വ്യാപക നാശം.നിരവധി വീടുകളും റോഡുകളും തകർന്നു.വ്യാപകമായി കൃഷിയും നശിച്ചിട്ടുണ്ട്. മലവെള്ളം ഇരച്ചെത്തിയതിന്റെ ഞെട്ടൽ വിട്ടുമാറിയിട്ടില്ല ഇന്നാട്ടുകാർക്ക്. ഇന്നലെ വൈകിട്ട് നാലരയോടെയാണ് കിഴക്കഞ്ചേരി പഞ്ചായത്തിലെ മലയോര ഗ്രാമങ്ങളിൽ മലവെള്ളമെത്തിയത്. വി ആർ ടി, ഓടംതോട്, പാലക്കുഴി എന്നിവിടങ്ങളിലെ ഉൾവനങ്ങളിലായിരുന്നു ഉരുൾപ്പൊട്ടൽ.

ചെറിയ തോടുകൾ നിറഞ്ഞ് കവിഞ്ഞൊഴുകി വ്യാപക കൃഷിനാശവും വീടുകൾക്ക് ഭാഗിക നാശവുമുണ്ടായി. പലയിടങ്ങളിലും റോഡുകൾ തകർന്നു. പുനർ നിർമ്മാണം ഉടൻ ആരംഭിക്കുമെന്നാണ് എം.എൽ. എ യുടെ വാഗ്ദാനം.നാശനഷ്ടങ്ങളുടെ കണക്കെടുപ്പ് ആരംഭിച്ചു. ജില്ലയിൽ ഇന്നലെ ഉച്ചക്ക് ശേഷം ശക്തമായ മഴയാണ് ലഭിച്ചത്.